సోనియాను తెలంగాణపై డిఎస్, జైపాల్ రెడ్డి తప్పు దోవ పట్టించారా?

హైదరాబాద్: ప్రస్తుత పరిస్థితికి ప్రదేశ్ కాంగ్రెసు కమిటీ (పిసిసి) అధ్యక్షుడు డి. శ్రీనివాస్, తెలంగాణ ప్రాంతానికి చెందిన కేంద్ర మంత్రి ఎస్ జైపాల్ రెడ్డి కారణమనే విమర్శలు వినిపిస్తున్నాయి. స్వయంగా కాంగ్రెసు తెలంగాణ ప్రాంత శాసనసభ్యులు, పార్లమెటు సభ్యుల నుంచే ఆ విమర్శలు వస్తున్నాయి. పిసిసి అధ్యక్షుడు డి. శ్రీనివాస్, జైపాల్ రెడ్డి తెలంగాణ విషయంలో సోనియాకు తప్పుడు సమాచారం అందజేశారని అంటున్నారు. పిసిసి అధ్యక్షుడి హోదాలో సోనియా వద్ద డిఎస్ సమైక్యవాదం వినిపించారని అంటున్నారు. రాష్ట్రంలో మాత్రం డిఎస్ తెలంగాణవాదిగా చెలామణి అవుతున్నారని వారు వ్యాఖ్యానిస్తున్నారు.

ఉప ఎన్నికల్లో తెలంగాణవాదులు తనను ఓడించారనే కక్షతో డిఎస్ సోనియా వద్ద సమైక్యవాదం వినిపించారని అంటున్నారు. తెలంగాణ ప్రాంతంవారే తెలంగాణకు అన్యాయం చేస్తున్నారని చాలా కాలంగా కాంగ్రెసు తెలంగాణ ప్రాంత పార్లమెంటు సభ్యుడు మధు యాష్కీ విమర్సిస్తున్న విషయం తెలిసిందే. జైపాల్ రెడ్డిపై, డిఎస్‌పై కాంగ్రెసు తెలంగాణ ప్రాంత నాయకులు గుర్రుగా ఉన్నట్లు తెలుస్తోంది.