వైయస్ జగన్ ఢిల్లీ ధర్నా: ఎమ్మెల్యేల అదుపునకు కిరణ్ వ్యూహం

హైదరాబాద్: రైతు సమస్యలపై, కృష్ణా ట్రిబ్యునల్ తీర్పుపై వైయస్ జగన్ ఈ నెల 11వ తేదీన ఢిల్లీలో ధర్నా చేపట్టనున్న నేపథ్యంలో ముఖ్యమంత్రి కిరణ్ కుమార్ రెడ్డి అప్రమత్తమయ్యారు. ఢిల్లీ ధర్నాకు రైలులో వైయస్ జగన్ ఈ నెల 9వ తేదీన తనతో కలిసి వచ్చే ప్రజాప్రతినిధులతో హైదరాబాదు నుంచి బయలుదేరనున్నారు. జగన్‌తో పాటు శాసనసభ్యులు వెళ్లకుండా చూసేందుకు కిరణ్ కుమార్ రెడ్డి ప్రయత్నాలు మొదలు పెట్టారు. శాసనసభ్యులను కట్టడి చేసేందుకు ఆయన తిప్పలు పడుతున్నారు. శుక్రవారం ఆయన పశ్చిమ గోదావరి జిల్లా శాసనసభ్యులతో మాట్లాడారు. వారికి తాయిలాలు కూడా హామీ ఇచ్చినట్లు తెలుస్తోంది.

వైయస్ జగన్ వెంట ఢిల్లీకి వెళ్తారని భావిస్తున్న కాంగ్రెసు శాసనసభ్యులకు కిరణ్ కుమార్ రెడ్డి ఫోన్లు చేస్తున్నట్లు తెలుస్తోంది. దానికితోడు శాసనసభ్యులను కట్టడి చేయాల్సిన బాధ్యతను ఆయన జిల్లాల మంత్రులకు, జిల్లాల ఇంచార్జీ మంత్రులకు అప్పగించినట్లు సమాచారం. ఆయా జిల్లాల మంత్రులు, ఇంచార్జీ మంత్రులు తమ తమ జిల్లాలకు చెందిన శాసనసభ్యులతో మాట్లాడుతున్నట్లు సమాచారం.