షీలా కీ జవానీకి ఎఫెక్ట్: ముంబైలో ఘర్షణ, ఓ వ్యక్తి బలి

ముంబై: షీలా కీ జవానీ రెండు గ్రూపుల మధ్య ఘర్షణకు దారి తీసింది. దీంతో బాంద్రాలో ఓ వ్యక్తి మృత్యువాత పడ్డాడు. కత్రినా కైఫ్ నృత్యం చేసిన షీలా కీ జవానీ పాట పాడుతూ మద్యం సేవించిన ఓ మహిళను సోమవారం తెల్లవారు జామున ఆట పట్టించారు. మహిళలు బాంద్రా రిక్లమేషన్‌లోని ట్రాన్సిట్ క్యాంపునకు వెళ్తుండగా ఈ సంఘటన చోటు చేసుకుంది. ఆమె విషయాన్నంతా తన బంధువులకు వివరించింది. వారు మహిళను వేధించిన పురుషుల బంధువులతో మాట్లాడాలని నిర్ణయించుకున్నారు.

మహిళ బంధువులు పురుషుల బంధువులతో బాబా ఆస్పత్రి వద్ద ఘర్షణకు దిగారని పోలీసులు చెప్పారు. ఇరు వైపులా మరింత మంది చేరారు. దాదాపు 450 మంది గుమిగూడారు. ఈ ఘర్షణలో పురుషుల బంధువుల తరఫున వచ్చిన జుబేర్ మన్సూరి అనే వ్యక్తి మరణించాడు. ఎదురు ముఠా వాళ్లు కత్తులతో, వెదురు బొంగులతో, ఇనుప రాడ్లతో దాడి చేశారు. హత్య సంఘటనలో సాజిద్ ఖురేష్ అనే వ్యక్తిని అరెస్టు చేసినట్లు మరో పది మంది పరారీలో ఉన్నట్లు పోలీసులు తెలిపారు.