జగన్, సిఎం వర్గం సవాళ్లు, ప్రతిసవాళ్లకే పరిమితం: హరీష్

హైదరాబాద్: మాజీ పార్లమెంటు సభ్యుడు వైఎస్ జగన్మోహన్ రెడ్డి వర్గం, కాంగ్రెస్ ప్రభుత్వం అవిశ్వాసం, రాజీనామాలపై సవాళ్లు ప్రతిసవాళ్లు విసురుకోవడానికే పరిమితం అయ్యారని తెలంగాణ రాష్ట్ర సమితి సీనియర్ నాయకుడు, సిద్దిపేట శాసనసభ్యుడు టి హరీష్‌రావు శుక్రవారం అదిలాబాదులో అన్నారు. అవిశ్వాస తీర్మానం పెడితే నెగ్గుతామో లేదో అని జగన్ వర్గం, విశ్వాసం నిరూపించుకోగలమో లేదో అని ప్రభుత్వం అనుమానాలలో ఉండిపోయిందన్నారు. అంతేగానీ అవిశ్వాసానికి మాత్రం జగన్ వర్గం ముందుకు రావడం లేదన్నారు. అవిశ్వాస తీర్మానం ప్రవేశ పెట్టాల్సిన బాధ్యత ప్రతిపక్ష నేతగా తెలుగుదేశం పార్టీ అధ్యక్షుడు చంద్రబాబునాయుడికి లేదా అని ప్రశ్నించారు.

అధికారా కాంగ్రెస్, ప్రతిపక్ష టిడిపి పార్టీలు దొంగాపోలీసు, చీకటి వెలుగులాగా లోపాయకారిగా కలిసిపోయాయని ఆరోపించారు. అందుకే చంద్రబాబు అవిశ్వాసం గురించి మాట్లాడటం లేదన్నారు. తెలంగాణపై కేంద్రం డిసెంబర్ 9న చేసిన ప్రకటనకు కట్టుబడి ఉండాల్సిందేనన్నారు. ఆ ప్రకటనపై చంద్రబాబుకు అడగవలసిన బాధ్యత లేదని అని ప్రశ్నించారు. తెలంగాణ సాధనలో భాగంగా ఫిబ్రవరిలో సహాయ నిరాకరణ చేపడతామన్నారు. పెన్‌డౌన్, హైదరాబాదు దిగ్బంధం ఉంటుందన్నారు. ప్రజలను పన్నులు చెల్లించకుండా చేస్తామని హెచ్చరించారు.

నక్సలైట్లు అయినా, నాశనం అయినా తెలంగాణ ప్రాంతం ఎలా ఉన్నా మా తెలంగాణ మాకు ఇవ్వండని తెలంగాణ ఐక్య కార్యాచరణ సమితి చైర్మన్ ప్రొఫెసర్ కోదండరామ్ హైదరాబాదులో అన్నారు. హైదరాబాదులో సీమాంధ్రులు 15శాతం కూడా లేరని అన్నారు. ప్రాంతాలు, పెట్టుబడుల గురించే కేంద్రం ఏర్పాటు చేసిన శ్రీకృష్ణ కమిటీ ఆలోచించిందన్నారు. కానీ ప్రజల గురించి ఆలోచించలేదన్నారు.