మద్దెలచెర్వు సూరితో వైఎస్ జగన్‌కు లింకులు: వర్ల రామయ్య

హైదరాబాద్: మాజీ పార్లమెంటు సభ్యుడు వైఎస్ జగన్మోహన్ రెడ్డికి మద్దెలచెర్వు సూరితో సంబంధాలు ఉన్నాయని తెలుగుదేశం పార్టీ సీనియర్ నాయకుడు వర్ల రామయ్య సోమవారం అన్నారు. పరిటాల రవి హత్య కేసును మళ్లీ దర్యాఫ్తు చేయాలని కోరుతూ తెలుగుదేశం పార్టీ నేతలు సిబిఐ డిఐజిని కలిశారు. ఈ సందర్భంగా వర్ల మాట్లాడారు. జగన్‌కు మంగళి కృష్ణతో సంబంధాలు ఉన్నాయని అన్నారు. మంగళి కృష్ణతో మద్దెలచెర్వు సూరికి సంబంధాలు ఉన్నాయన్నారు. జగన్‌కు కృష్ణతో గల సంబంధాలను మద్దెలచెర్వు సూరితో సంబంధాలు పెరగడానికి దోహదపడ్డాయని అన్నారు.

పరిటాల రవి హత్య కేసును మళ్లీ దర్యాప్తు చేయాలని వారు సిబిఐ డిఐజిని కోరారు. ముఖ్యమంత్రి కిరణ్‌కుమార్ రెడ్డి సైతం ఓ మాజీ మంత్రి కేసులో జగన్‌పై ఆరోపణలు వచ్చినప్పుడు ఆ కేసును తాను 60 రోజులు స్టడీ చేసినట్టుగా స్వయంగా చెప్పారన్నారు. ముఖ్యమంత్రి స్వయంగా చెప్పినందువల్ల జగన్‌కు పరిటాల రవి హత్య కేసులో సంబంధం ఉందని తేటతెల్లం అవుతుందని మళ్లీ విచారణ జరిపించాలని వారు కోరారు. ఈ నేపథ్యంలో జగన్ను, ముఖ్యమంత్రిని కూడా విచారణ చేయాలని వారు సిబిఐని కోరారు.