కాంగ్రెసుతో విలీనమా, పొత్తా అనేది ఇంకా తేల్చుకోలేదు: చిరంజీవి

తిరుపతి: కాంగ్రెసులో విలీనం కావాలా, కాంగ్రెసుతో పొత్తు పెట్టుకోవాలా అనే విషయంపై ఇంకా నిర్ణయం తీసుకోలేదని ప్రజారాజ్యం పార్టీ అధ్యక్షుడు చిరంజీవి చెప్పారు. రచ్చబండలో పాల్గొనడానికి తిరుపతి వచ్చిన ఆయన మంగళవారం మీడియా ప్రతినిధులతో మాట్లాడారు. ఈ నెల 4,5 తేదీల్లో దానిపై పార్టీ శాసనసభ్యులతో, పార్టీ ముఖ్యులతో చర్చలు జరుపనున్నట్లు, ఈ సమావేశంలో నిర్ణయం తీసుకోనున్నట్లు ఆయన తెలిపారు. కాంగ్రెసు అధ్యక్షురాలు సోనియా గాంధీతో భేటీ అయ్యే తేదీ కూడా ఖరారు కాలేదని ఆయన చెప్పారు. కాంగ్రెసు ఆఫర్‌పై నిర్ణయం తీసుకోలేదని ఆయన చెప్పారు.

సోనియాతో భేటీ తర్వాత కాంగ్రెసుతో దోస్తీపై నిర్ణయం తీసుకుంటామని ఆయన చెప్పారు. కాంగ్రెసుతో తమ దోస్తీపై తెలంగావాదులు చేస్తున్న విమర్శలను పట్టించుకోబోమని ఆయన చెప్పారు. కాగా, కాంగ్రెసులో తమ పార్టీ వీలనమవుతోందనే వార్తలను ప్రజారాజ్యం పార్టీ శాసనసభ్యుడు గంటా శ్రీనివాస రావు హైదరాబాదులో ఖండించారు. చిరంజీవిని ఢిల్లీకి ఆహ్వానించేందుకే కాంగ్రెసు కోర్ కమిటీ సభ్యుడు ఎకె ఆంటోనీ హైదరాబాదు వచ్చినట్లు ఆయన తెలిపారు.