కిరణ్ కుమార్ రెడ్డి ప్రభుత్వంపై ధ్వజమెత్తిన వైయస్ జగన్

కడప: ముఖ్యమంత్రి కిరణ్ కుమార్ రెడ్డి ప్రభుత్వంపై మాజీ పార్లమెంటు సభ్యుడు వైయస్ జగన్ తీవ్రంగా ధ్వజమెత్తారు. బంగాళాఖాతంలో పడేయడానికి కూడా ఈ ప్రభుత్వం పనికి రాదని ఆయన అన్నారు. అభివృద్ధి, సంక్షేమ పథకాలు సక్రమంగా అమలు చేయని రాష్ట్ర ప్రభుత్వానికి పాలించే అర్హత లేదని ఆయన అన్నారు. సర్కార్‌ను బంగాళాఖాతంలో పడవేసినా వ్యర్థమేనన్నారు.పేదలను పట్టించుకోని ప్రభుత్వాలు కూలిపోక తప్పదన్నారు. కడప జిల్లా పులివెందులలో మంగళవారం ఆయన ముస్లిం మైనార్టీలతో భేటీ అయ్యారు.

దేశంలోనే ముస్లింలకు నాలుగు శాతం రిజర్వేషన్లు కల్పించిన ఘనత వైఎస్ రాజశేఖరరెడ్డిదేనన్నారు. మైనార్టీ విద్యార్థులకు ఫీజు రీయింబర్స్‌మెంట్ కింద జిల్లాకు రూ.114 కోట్లు బకాయిలు రావల్సి ఉందన్నారు. అయితే ప్రభుత్వం మాత్రం పైసా కూడా విడుదల చేయలేదని మండిపడ్డారు. కమిషన్లు వేయటం తప్పా ప్రభుత్వాలు ముస్లింలకు చేసింది ఏమీ లేదని జగన్ అన్నారు. పేదల సంక్షేమం ఈ ప్రభుత్వానికి పట్టడం లేదని ఆయన అన్నారు. విద్యార్థుల జీవితాలతో ఆటలాడుతోందని ఆయన విమర్శించారు. ఫీజుల రీయంబర్స్‌మెంటులో ప్రభుత్వం అన్యాయంగా వ్యవహరిస్తోందని ఆయన అన్నారు.