వైయస్ జగన్ వర్గానికి చెందిన శాసనసభ్యులపై చర్యలు: కొండ్రు మురళి

హైదరాబాద్: మాజీ పార్లమెంటు సభ్యుడు వైయస్ జగన్ వెంట వెళ్తున్న శాసనసభ్యులపై చర్యలు తీసుకుంటామని ప్రభుత్వ విప్ కొండ్రు మురళి చెప్పారు. ఆయన మంగళవారం మీడియా ప్రతినిధుల సమావేశంలో ఆ విషయం చెప్పారు. కాంగ్రెసు అధ్యక్షురాలు సోనియా గాంధీపై విమర్సలు చేసిన తెలుగుదేశం నాయకులపై ఎమ్మెల్సీ రుద్రరాజు పద్మరాజు, కొండ్రు మురళి తీవ్రంగా ధ్వజమెత్తారు. తెలుగుదేశం పార్టీ నాయకుడు గాలి ముద్దకృష్ణమనాయుడు నోరు అదుపులో పెట్టుకోవాలని వారు సూచించారు.

సోనియాను విమర్శించే నైతిక హక్కు తెలుగుదేశం పార్టీ నాయకులకు లేదని వారన్నారు. రాజ్యసభ సీటు అమ్ముకుని తెలుగుదేశం పార్టీ అధ్యక్షుడు టీవీ చానెల్ కొనుక్కున్నారని వారు ఆరోపించారు. గాలి ముద్దుకృష్ణమ నాయుడు చంద్రబాబు ప్రాపకం కోసం కాంగ్రెసుపై విమర్శలు చేస్తున్నారని వారన్నారు. అచ్చోసిన ఆంబోతులా గాలి ముద్దుకృష్ణమ నాయుడు మాట్లాడుతున్నారని, ముద్దుకృష్ణమ నాయుడివన్నీ గాలి మాటలేనని ఆయన అన్నారు.

English summary

Government whip Kondru Murali says action would be taken against the MLAs, who supporting YS Jagan. Murali along with MLC Radraraju Padmaraju lashed out at Telugudesam leaders for criticising their leader Sonia Gandhi and their Congress party.