పరువు నిలుపుకోండి: కాంగ్రెసు‌కు రాములమ్మ హెచ్చరిక

By Srinivas

Published: Thursday, February 24, 2011, 15:05 [IST]

న్యూఢిల్లీ: కేంద్ర ప్రభుత్వం నాలుగు కోట్ల తెలంగాణ ప్రజల ఆకాంక్ష అయిన ప్రత్యేక తెలంగాణను ప్రకటించి పరువు నిలబెట్టుకోవాలని తెలంగాణ రాష్ట్ర సమితి పార్లమెంటు సభ్యురాలు విజయశాంతి గురువారం ఓ టీవి కార్యక్రమంలో చెప్పారు. కాంగ్రెసు పార్టీకి ప్రత్యేక తెలంగాణ విషయంలో చిత్తశుద్ధి లేదని ఆరోపించారు. తెలంగాణ ప్రకటిస్తే కాంగ్రెసు పరువు నిలబడుతుందన్నారు. లేదంటే తెలంగాణలోనే కాంగ్రెసు భూస్థాపితం అవుతుందని హెచ్చరించారు. కాంగ్రెసు పార్టీకి రోజులు దగ్గర పడ్డాయన్నారు. ప్రతిపక్ష భారతీయ జనతా పార్టీ ఆధ్వర్యంలోని ఎన్డీయేతో కలిసి కేంద్రం మెడలు వంచి అయినా తెలంగాణను సాధిస్తామని చెప్పారు.

తెలంగాణ కాంగ్రెసు పార్లమెంటు సభ్యులు బుధవారం తెలంగాణపై ధీటుగా స్పందించినప్పటికీ ఆ తర్వాత ప్రధానమంత్రి మన్మోహన్ సింగ్, కేంద్ర మంత్రి ప్రణబ్ ముఖర్జీ క్లాస్ పీకడంతో మొహం చాటేశారని అన్నారు. తెలంగాణ వచ్చేంత వరకు పార్లమెంటును స్తంభింపజేస్తామని హెచ్చరించారు. తెలంగాణ ప్రజలకు ప్రత్యేక రాష్ట్రం విషయంలో ఇంకా వేచి చూసే ఓపిక లేదన్నారు. తెలంగాణ ప్రజలు అంతర్గతంగా తీవ్రంగా రగులుతున్నారన్నారు.

Published On February 24, 2011