అసెంబ్లీలో తెలంగాణ కరపత్రాల గొడవ: సీమాంధ్రులకు పంచిన కెఎల్ఆర్

By Srinivas

Published: Monday, February 28, 2011, 10:42 [IST]

హైదరాబాద్: పార్లమెంటులో సమైక్యాంధ్ర కరపత్రాల మాదిరి అసెంబ్లీలో కూడా కరపత్రాలను పంచారు. మేడ్చల్ కాంగ్రెస్ పార్టీ శాసనసభ్యుడు కిచ్చెన్నగారి లక్ష్మారెడ్డి(కెఎల్ఆర్) తెలంగాణకు అనుకూలంగా సీమాంధ్ర ఎమ్మెల్యేలకు కరపత్రాలు పంచారు. తెలంగాణ ప్రజా ప్రతినిధుల పేరున ఆ కరపత్రాలు పంచారు. ప్రత్యేక తెలంగాణకు సీమాంధ్ర ఎమ్మెల్యేలు ఒప్పుకోవాలని ఆయన అందులో కోరారు. అన్నదమ్ముల్లా విడిపోదాం, ఆత్మీయుల్లా కలిసి ఉందాం అని ఆ కరపత్రంలో పేర్కొన్నారు. తెలంగాణ ప్రాంతానికి వివాద బిందువు అయిన హైదరాబాద్‌పైన చర్చించుకుందామని ఆయన ఎమ్మెల్యేలను కోరారు.

ఆ కరపత్రంలో ఆయన సీమాంధ్రులకు హైదరాబాద్‌పైన రెండు ఆప్షన్స్ ఇచ్చారు. గ్రేటర్ హైదరాబాదా లేకా రెవెన్యూ హైదరాబాదా అని, రెండోది తాత్కాలిక కేంద్ర పాలిత ప్రాంతమా, ఉమ్మడి రాజధానియా చర్చించుకుందామని సూచించారు. మనుషులమే విడిపోతున్నాం కానీ, మనసుల విభజన కాదని కెఎల్ఆర్ ఆ కరపత్రంలో పేర్కొన్నారు. పరిపాలనా విభజనను ప్రజలంతా కోరుకుంటున్నారని ఆయన సూచించారు. హైదరాబాద్‌పై అందరూ ముందుకు వస్తే చర్చించుకుందామని చెప్పారు.

Published On February 28, 2011