చంద్రబాబుతో జెసి దివాకర్ ప్రతిపాదన తప్పు: ఏరాసు ప్రతాప రెడ్డి

By Pratap

Published: Tuesday, March 1, 2011, 16:59 [IST]

హైదరాబాద్: సమైక్యాంధ్ర కోసం శాసనసభ సమావేశాలను బహిష్కరిద్దామని తమ కాంగ్రెసు పార్టీ సీమాంధ్ర శాసనసభ్యుడు జెసి దివాకర్ రెడ్డి చేసిన ప్రతిపాదన సరి కాదని రాష్ట్ర మంత్రి ఏరాసు ప్రతాప రెడ్డి అన్నారు. అలాంటి చర్యలు రెచ్చగొట్టడమే అవుతుందని ఆయన అన్నారు. ప్రభుత్వ చీఫ్ విప్ మల్లుభట్టి విక్రమార్కతో కలిసి ఆయన మంగళవారం మీడియా ప్రతినిధుల సమావేశంలో మాట్లాడారు. తెలంగాణపై కాంగ్రెసు అధిష్టానం నిర్ణయానికి తాము కట్టుబడి పని చేయాల్సి ఉంటుందని ఆయన అభిప్రాయపడ్డారు. శ్రీకాకుళం జిల్లా కాకర్లపాడు కాల్పుల ఘటనపై ప్రభుత్వం చర్చకు సిద్ధంగా ఉన్నట్లు చెప్పిన ప్రధాన ప్రతిపక్షం తెలుగుదేశం పార్టీ వినలేదని, గొడవ చేయడమే ప్రధానంగా పెట్టుకుందని ఆయన విమర్శించారు.

శానససభా సమావేశాలను వృధా చేయడం సరి కాదని మల్లుభట్టి విక్రమార్క అన్నారు. పద్ధతి ప్రకారం శాసనసభలో నడుచుకోవాలని ఆయన సూచించారు. తాము శాసనసభలో చర్చకు సిద్ధంగా ఉన్నామని, పరిష్కారానికి కూడా సిద్ధంగా ఉన్నామని ఆయన చెప్పారు. శాసనసభ సజావుగా నడవడం తెలుగుదేశం పార్టీకి ఇష్టం లేదని ఆయన వ్యాఖ్యానించారు. తెలుగుదేశం పార్టీని చూస్తే జాలేస్తోందని ఆయన అన్నారు. తెలుగుదేశం వైఖరి వల్ల ప్రజా ధనం వృధా అవుతోందని ఆయన అభిప్రాయపడ్డారు.

Published On March 1, 2011