చిదంబరం ఓ డయ్యర్‌లా వ్యవహరిస్తున్నారు: టిడిపి నేత గాలి!

By Srinivas

Published: Wednesday, March 2, 2011, 17:27 [IST]

హైదరాబాద్: కేంద్ర హోంశాఖామంత్రి చిదంబరాన్ని జనరల్ డయ్యర్‌తో తెలుగుదేశం పార్టీ సీనియర్ నాయకుడు, మాజీ మంత్రి గాలి ముద్దు కృష్ణమనాయుడు పోల్చారు. చిదంబరం వ్యాఖ్యల్లో విశ్వసనీయత లేదన్నారు. ఇద్దరు మంచిగా ఉన్న అన్నదమ్ముల మధ్య ఏఐసిసి అధ్యక్షురాలు సోనియాగాంధీ, కాంగ్రెస్ పార్టీ చిచ్చు పెట్టిందన్నారు. తెలంగాణ పేరుతో ఉద్రిక్తం సృష్టించిన కాంగ్రెస్ పార్టీ రాష్ట్రాన్ని యాభయ్యేళ్ల పాటు వెనక్కి తీసుకు వెళ్లిందని అన్నారు. కేంద్ర ప్రభుత్వం తెలంగాణ అంశంపై నాన్చడం సరికాదన్నారు. దానిని వెంటనే తేల్చాలని ఆయన డిమాండ్ చేశారు.

చిదంబరం మొదట తన రాష్ట్రం తమిళనాడుపై దృష్టి సారించాలన్నారు. ఇక్కడి మాదిరే అక్కడ తమిళనాడులో ప్రత్యేక రాష్ట్రం డిమాండ్లు వస్తున్నాయని ఆయన దానిని ఆమోదిస్తారా అని ప్రశ్నించారు. కేంద్రం ఆధీనంలో ఉన్న అంశాన్ని రాష్ట్రంలోని పార్టీలపై వేసి దులుపుకోవాలని చూస్తున్నారన్నారు. ఆంధ్ర, రాయలసీమ ప్రాంతానికి చెందిన తెలుగుదేశం పార్టీ శాసనసభ్యులు అంతా సమైక్యవాదులేనని ఆయన స్పష్టం చేశారు. సీమాంధ్ర టిడిపిలో ఎవరూ ప్రత్యేక తెలంగాణను ఆమోదించరన్నారు.

Published On March 2, 2011