మిలియన్ మార్చ్‌లో మార్పు లేదు, పదవ తేదీన్నే: కోదండరామ్

By Pratap

Published: Thursday, March 3, 2011, 15:51 [IST]

హైదరాబాద్: తెలంగాణ కోసం తాము తలపెట్టిన మిలియన్ మార్చ్ టు హైదరాబాదులో మార్పు లేదని తెలంగాణ జెఎసి చైర్మన్ కోదండరామ్ స్పష్టం చేశారు. ఈ నెల 10వ తేదీన మిలియన్ మార్చ్ ఉంటుందని ఆయన గురువారం మీడియా ప్రతినిధుల సమావేశంలో చెప్పారు. దీన్ని విజయవంతం చేయాలని, హైదరాబాదు ప్రజలు ఆ రోజు వీధుల మీదకు రావాలని ఆయన పిలుపునిచ్చారు. అన్ని వర్గాల ప్రజలు, అన్ని రంగాల ఉద్యోగులు ఈ మిలియన్ మార్చ్‌లో పాల్గొంటారని ఆయన చెప్పారు.

తెలంగాణపై పార్లమెంటు సభ్యులు ఈ రోజు ఒక గొంతుతో వినిపించారని ఆయన చెప్పారు. ఈ స్థితిలో తెలంగాణపై కేంద్ర ప్రభుత్వం ఒక నిర్ణయానికి రావాలని, తెలంగాణ రాష్ట్ర ఏర్పాటుకు ప్రకటన చేయాలని ఆయన డిమాండ్ చేశారు. తెలంగాణ ఉద్యమాన్ని మరింత ఉధృతం చేస్తామని ఆయన చెప్పారు. ఇంటర్మీడియట్ పరీక్ష ఉన్న నేపథ్యంలో మిలియన్ మార్చ్ వాయిదా వేయాలని కొన్ని రాజకీయ పార్టీలు కోరాయి. అయితే అందుకు కోదండరామ్ అంగీకరించలేదు. ఇంటర్మీడియట్ పరీక్షను వాయిదా వేయబోమని, ఆటంకం ఏర్పడకుండా చూస్తామని మంత్రి పార్థసారథి హామీ ఇచ్చారు.

Published On March 3, 2011