• search
  • Live TV
వేగవంతమైన అలర్ట్స్ కోసం
నోటిఫికేషన్స్ పై క్లిక్ చేయండి  
For Daily Alerts

మేం వెళ్లిపోతే తెలంగాణకు మిగిలేది మొండి గోడలే: రాయపాటి

By Pratap
|
Google Oneindia TeluguNews
Rayapati Sambasiva Rao
న్యూఢిల్లీ: సీమాంధ్రులు హైదరాబాద్‌ను వదిలివెళ్తే అక్కడి పరిశ్రమలన్నీ మూతపడతాయని, తర్వాత తెలంగాణవాళ్లంతా ఖాళీ గోడలను చూసుకోవాల్సిందేనని కాంగ్రెసు గుంటూరు పార్లమెంటు సభ్యుడు రాయపాటి సాంబశివరావు వ్యాఖ్యానించారు. హైదరాబాద్‌లో కావూరి ఇంటి ముట్టడి నేపథ్యంలో బుధవారం రాత్రి ఆయన మీడియా ప్రతినిధులతో మాట్లాడారు. తెలంగాణ న్యాయవాదుల తీరును ఆయన ఖండించారు. అది సహించరాని విషయమని వ్యాఖ్యానించారు. శ్రీకృష్ణ కమిటీ నివేదికను అధ్యయనం చేయడానికి 4 నుంచి 5 నెలల సమయం పడుతుందని, రాత్రికి రాత్రి తేల్చడం సాధ్యం కాదని అన్నారు.

సామరస్యపూర్వకంగా సమస్యను పరిష్కరించాలని తమ పార్టీ అధిష్ఠానం ఆలోచిస్తోందని చెప్పారు. అందువల్ల తెలంగాణవారు కొంత కాలం ఆగాలని, తొందరపడితే వారికే నష్టమని తెలిపారు. తెరాస నేతలు, కోదండరాంలు కలిసి రాష్ట్ర ప్రభుత్వాన్ని అస్థిరపరచడానికి కుట్ర పన్నుతున్నారని రాయపాటి తీవ్రంగా ఆరోపించారు. తెలంగాణ ప్రజాప్రతినిధులను ఊళ్లల్లోకి రానివ్వబోమని కోదండరాంలాంటి వాళ్లు ఒత్తిడి తేవడంవల్లే ఎంపీలు, ఎమ్మెల్యేలు విధిలేని పరిస్థితుల్లో తెలంగాణ గురించి మాట్లాడుతున్నారని, లేదంటే వారంతా పార్టీకి విశ్వాసపాత్రులేనని అన్నారు.

తెలంగాణపై నిర్ణయం తీసుకోలేమని కాంగ్రెస్‌ చెప్పినప్పుడే రాజీనామాలపై ఆలోచించాలని సూచించారు. తాము సమైక్యాంధ్ర కోసం రాజీనామాలు చేయబోమని, తెలంగాణవాళ్లూ చేయాలని కోరుకోవడంలేదని స్పష్టం చేశారు. ఒకవేళ తాను రాజీనామా చేసినా తమ ప్రాంతంలో తనకు పుట్టగతులుండవని పేర్కొన్నారు. సమైక్యాంధ్ర ప్రజాప్రతినిధులు కలిసి కూర్చుని మాట్లాడుకుంటే తప్పేమిటని రాయపాటి ప్రశ్నించారు. తెలంగాణ నాయకులు వారానికోసారి ఢిల్లీకొచ్చి సమావేశాలు పెట్టుకోవడంలేదా అని నిలదీశారు.

English summary
Congress Seemandhra MP Rayapati Sambasiva Rao says if they leave Hyderabad, all the industries will be closed. He condemned lawyers dharna in front of Kavuri's residence.
న్యూస్ అప్ డేట్స్ వెంటనే పొందండి
Enable
x
Notification Settings X
Time Settings
Done
Clear Notification X
Do you want to clear all the notifications from your inbox?
Settings X