చంద్రబాబు పార్టీ రెండు ముక్కలయింది, మొసలి కన్నీరు: జగన్

By Srinivas

Published: Monday, March 7, 2011, 17:39 [IST]

శ్రీకాకుళం: ఈస్ట్ కోస్ట్ పవర్ ప్రాజెక్టు వల్ల రాష్ట్రంలో ప్రధాన ప్రతిపక్షం తెలుగుదేశం పార్టీ రెండుగా చీలిపోయిందని మాజీ పార్లమెంటు సభ్యుడు వైఎస్ జగన్మోహన్ రెడ్డి సోమవారం అన్నారు. పవర్ ప్రాజెక్టులో ప్రాణాలు కోల్పోయిన కుటుంబాలను జగన్ సోమవారం పరామర్శించారు. అనంతరం రైతు, మత్స్యకార మహాధర్నాలో పాల్గొన్నారు. సాయంత్రం వరకు ఆయన పర్యనట కొనసాగింది. ఈ సందర్భంగా ఆయన విలేకరులతో మాట్లాడారు. టిడిపి అధ్యక్షుడు చంద్రబాబు ప్రాజెక్టు విషయంలో ముసలి కన్నీరు కారుస్తున్నారని అన్నారు. చంద్రబాబును ప్రజలు నమ్మె స్థితిలో లేరని అన్నారు.

థర్మల్ ప్రాజెక్టు తన తండ్రి అయిన దివంగత ముఖ్యమంత్రి వైఎస్ రాజశేఖరరెడ్డి హయాంలోనే వచ్చిందని చెప్పారు. అయితే అప్పుడు ప్రాజెక్టును ప్రజలు వ్యతిరేకించలేదన్నారు. ఇప్పుడు వ్యతిరేకిస్తున్నారు కాబట్టే ప్రజలకు మద్దతుగా వచ్చానని అన్నారు. తాను ప్రాజెక్టులకు వ్యతిరేకం కాదని అయితే ప్రజలను ఇబ్బందులకు గురి చేసే విధంగా మాత్రం ఉండకూడదని అన్నారు. కాగా కాంగ్రెస్ సీనియర్ నాయకుడు జ్యోతుల నెహ్రూ తాను జగన్ పార్టీలో చేరడానికి సిద్ధంగా ఉన్నట్టు ప్రకటించారు. ఈ నెల 11న జగన్ బహిరంగ సభ జిల్లాలో ఉంటుందని చెప్పారు.

Published On March 7, 2011