ప్రజలే మాకు పాస్ మార్కులు వేస్తారు: ముఖ్యమంత్రి కిరణ్‌ కుమార్

By Srinivas

Published: Tuesday, March 8, 2011, 10:48 [IST]

హైదరాబాద్: మాకు పాస్ మార్కులు వేయాల్సింది ప్రజలేనని ముఖ్యమంత్రి కిరణ్‌కుమార్ రెడ్డి మంగళవారం శాసనసభలో అన్నారు. పోర్టు కేటాయింపులపై చర్చ వచ్చినప్పుడు ఆయన ఈ వ్యాఖ్యలు చేశారు. కేంద్రం నుండి పోర్టు నిర్మాణానికి ప్రతిపాదనలు వచ్చాయని చెప్పారు. కేంద్రం ఎక్కడ కోరితే అక్కడ స్థలం కేటాయించడానికి రాష్ట్ర ప్రభుత్వం సిద్ధంగా ఉందని చెప్పారు. స్థలం కేటాయింపుల సందర్భంగా ఆయా ప్రజలకు ఎలాంటి ఇబ్బందులు లేకుండా చూడాల్సిన బాధ్యత ప్రభుత్వంపైనే ఉందన్నారు. త్వరలో భూ కేటాయింపులపై విధాన నిర్ణయాలు ప్రకటిస్తామన్నారు. భూ కేటాయింపులపై ప్రభుత్వం స్పష్టమైన వైఖరితో ఉందన్నారు. త్వరలో కొత్త విధానం ఉంటుందన్నారు. తీరప్రాంలోని మత్స్యకారుల విధానం దెబ్బతినకుంటా చర్యలు తీసుకుంటామని చెప్పారు.వాన్‌పిక్‌కు కేటాయించిన 2వేల ఎకరాల భూమి పెండింగ్‌లో ఉందన్నారు. పరిశ్రమలు భూములు ఎందుకు అడుగుతున్నాయో పరిశీలించి పరిగణనలోకి తీసుకుంటామని చెప్పారు.

గతంలో భూకేటాయింపులలో జరిగిన అక్రమాలపై తప్పు సమీక్షిస్తానని ముఖ్యమంత్రి చెప్పడం అభినందనీయమని లోక్‌సత్తా అధ్యక్షుడు జయప్రకాష్ నారాయణ అన్నారు. ప్రజా ప్రయోజనాలు పక్కన పెట్టి బిడ్డింగుల్లో మార్పులు చేయడాన్ని ఆయన ప్రశ్నించారు. పోర్టులు అవినీతి నిలయంగా మారుతున్నాయన్నారు. భూ కేటాయింపులపై అన్ని విధానాలు బహిరంగ పర్చాలని డిమాండ్ చేశారు. పోర్టు కోసం కేంద్రం అడిగిన చోట స్థలాన్ని కేటాయించలేని స్థితిలో ప్రభుత్వం ఉందన్నారు. పోర్టుకు కేటాయించిన భూములు తాకట్టు పెట్టుకునే అధికారం ఎవరిచ్చారని ప్రశ్నించారు. తీరప్రాంతంలో కిలోమీటర్ల కొద్ది స్థలం కేటాయించవద్దని కేంద్రం చెప్పిందని అన్నారు.

కాగా రాష్ట్ర అభివృద్ధి విషయంలో ప్రభుత్వం కొత్త పోకడలకు అన్ని చర్యలు తీసుకుంటుందని మంత్రి కోమటిరెడ్డి వెంకట్‌రెడ్డి అన్నారు. కాగా పోర్టుల నిర్ణయాలపై శాసనసభా కమిటీని వేయాలని ప్రజారాజ్యం పార్టీ ఎమ్మెల్యే కన్నబాబు, టిడిపి నేత గాలిముద్దుకృష్ణమ నాయుడు అన్నారు.

Published On March 8, 2011