వైయస్సార్ పార్టీ స్థాపనకు జగన్ ఎందుకు తొందరపడ్డారు?

హైదరాబాద్: వైయస్సార్ పార్టీ స్థాపనకు మాజీ పార్లమెంటు సభ్యుడు వైయస్ జగన్ ఎందుకు తొందరపడ్డారనేది తొందర పడ్డారనేది ఇప్పుడు చర్చనీయాంశంగా మారింది. తన వర్గం నాయకులతో చర్చించకుండా, ఏకపక్షంగా అనూహ్యంగా ఆయన పార్టీ పేరును ప్రకటించి, పార్టీ ఆవిష్కరణకు పూనుకున్నారు. ఇంతగా ఆయన తొందర పడడానికి గల కారణాలపై విస్మయం వ్యక్తమవుతోంది. వైయస్ సతీమణి వైయస్ విజయలక్ష్మి శనివారం పులివెందులలో పార్టీ పతాకను ఆవిష్కరించారు. అంటే పార్టీ స్థాపన జరిగినట్లే. ప్రసంగాలు లేకుండా పార్టీ విధానాలు ప్రకటించకుండా జగన్ పార్టీని స్థాపించేశారు. ఈ కార్యక్రమానికి పెద్ద యెత్తున ప్రజలు, తన వర్గానికి చెందిన నాయకులు వచ్చారు. కానీ ఎన్నికల కోడ్ అమలులో ఉండడంతో ప్రసంగాలు లేకుండానే పార్టీ ఆవిష్కరణ జరిగిపోయింది. ఓ కుటుంబ కార్యక్రమంగా మాత్రమే దీన్ని నిర్వహిస్తున్నామని ఆయన ఎన్నికల సంఘానికి కూడా చెప్పుకున్నారు.

పార్టీ స్థాపనలో జరుగుతున్న జాప్యం వల్ల నాయకులు తీవ్ర అసంతృప్తికి గురవుతున్నారు. పార్టీ స్థాపన జరుగుతుందా, లేదా అనే సందేహాలు కూడా తలెత్తే స్థాయి వచ్చేసింది. ఇది ఆయన నిర్ణయానికి ఒక కారణం. తెలంగాణ అంశంపై కేంద్ర ప్రభుత్వం తేల్చిన తర్వాతనే ఆయన పార్టీని స్థాపిస్తారనే ప్రచారం కూడా ముమ్మరంగా సాగుతోంది. తెలంగాణపై తన వైఖరిని ప్రకటించాల్సిన అనివార్యత ఏర్పడుతుందనే ఆయన ఆగుతున్నారని అనుకుంటున్నారు. అది తదనంతర కాలంలో తెలంగాణలో ఆయనకు వ్యతిరేకతగా పనిచేసే ప్రమాదం ఉంది. దీనివల్ల కూడా ఆయన తొందరపడినట్లు కనిపిస్తున్నారు. ప్రసంగాలు చేయాల్సిన అవసరం లేదు కాబట్టి వివిధ అంశాలపై తన వైఖరిని ప్రకటించాల్సిన ఆగత్యం నుంచి ఆయన తప్పుకున్నారని అనుకోవాలి. తెలంగాణ, ఎస్సీ రిజర్వేషన్ల వర్గీకరణ వంటి కీలకమైన అంశాలపై వైఖరిని దాటవేయడానికి అనువైన తేదీని ఆయన ఎంచుకున్నట్లు భావించవచ్చు.

ఇదిలా వుంటే, జ్యోతిష్యం కూడా పార్టీ స్థాపనకు మరో కారణమని చెబుతున్నారు. మార్చి రెండో వారంలోగా పార్టీని స్థాపించాలని వారు సలహాలు ఇచ్చారని చెబుతున్నారు. మార్చి రెండో వారం దాటితే మంచిది కాదని చెప్పారని అంటున్నారు. దీంతో ఆయన మార్చి 12వ తేదీని అనువైనదిగా అనుకున్నట్లు చెబుతున్నారు. మొత్తం మీద, పార్టీని అనూహ్యంగా భారీ ఏర్పాట్లు లేకుండా జగన్ ప్రకటించడం మాత్రం అందరికీ ఆశ్చర్యంగానే ఉంది.

English summary

It is became a debate in political circle why YS Jagan launched his YSR Congress party without any hangama. It is said that he had not discussed about the launching of his party with his followers.