చిదంబరం ప్రకటన తర్వాత తెలంగాణ సెంటిమెంట్ బలపడింది: విహెచ్

By Srinivas

Published: Monday, March 14, 2011, 17:01 [IST]

న్యూఢిల్లీ: గత డిసెంబర్ 9న కేంద్రమంత్రి చిదంబరం తెలంగాణ ప్రక్రియ ప్రారంభం అవుతుందని ప్రకటించడంతో తెలంగాణ ప్రజల్లో సెంటిమెంటు మరింత బలపడిందని కాంగ్రెస్ పార్టీ సీనియర్ నాయకుడు వి హనుమంతరావు సోమవారం న్యూఢిల్లీలో అన్నారు. కేంద్రం తెలంగాణ సమస్యను తక్షణమే పరిష్కరించాలని డిమాండ్ చేశారు. ప్రస్తుతం తెలంగాణలో పరిస్థితులు బాగా లేవన్నారు. కాంగ్రెస్ పార్టీయే తెలంగాణ ఇస్తుందని చెప్పారు. తెలంగణపై ఇప్పుడు అందరూ ఉద్యమిస్తున్నారని చెప్పారు.

కాగా హోంమంత్రి చిదంబరంతో తెలంగాణ ఉద్యోగ సంఘాలు భేటీ అయ్యాయి. అనంతరం ఉద్యోగ సంఘాల నేతలు విలేకరులతో మాట్లాడారు. తెలంగాణ ప్రజల్లో ప్రస్తుతం నిరాశ నెలకొని ఉందని తాము చిదంబరానికి వివరించామని చెప్పారు. 14 ఎఫ్ నిబంధనను తొలగించాలని ఆయనకు విజ్ఞప్తి చేసినట్లు చెప్పారు. తెలంగాణ అంశాన్ని త్వరగా తేల్చకపోతే పెద్ద ఎత్తున ఉద్యమించడానికి ఉద్యోగ సంఘాలు సిద్ధంగా ఉన్నాయన్నారు. త్వరలోనే రెండోసారి అఖిలపక్షం ఏర్పాటు చేసి నిర్ణయం తీసుకుంటామని చిదంబరం చెప్పారన్నారు. తమకు ఉద్యోగుల సమస్యకంటే తెలంగాణ ఏర్పాటే ముఖ్యమన్నారు.

Published On March 14, 2011