చిరుపై శోభానాగిరెడ్డి ధిక్కారం: పీఆర్పీ విప్ జారీపై డోంట్ కేర్

హైదరాబాద్: ప్రజారాజ్యం పార్టీ వ్యవస్థాపక అధ్యక్షుడు చిరంజీవికి ఆ పార్టీ అసమ్మతి శాసనసభా సభ్యురాలు శోభా నాగిరెడ్డి షాక్ ఇచ్చారు. పీఆర్పీ విప్ జారీ చేసినా జారీ చేయక పోయినా తాను శాసనమండలి ఎన్నికలలో పాల్గొంటానని చెప్పారు. ఎన్నికలలో తన ఆంతరాత్మ ప్రబోధానుసారం ఓటు వేస్తానని ఆమె స్పష్టం చేశారు. ఓటు వేయకుండా మాత్రం ఉండనని చెప్పారు. అయితే, ఎమ్మెల్సీ ఎన్నికల్లో శాసనసభ్యుల కోటాలో వైయస్ జగన్ వర్గానికి చెందిన శానససభ్యులు ఎవరికి ఓటేస్తారనేది ఆసక్తికరంగా మారింది.

పీఆర్పీ మరో అసంతృప్త ఎమ్మెల్యే కాటసాని రామిరెడ్డి కూడా శోభానాగిరెడ్డి దారిలోనే వెళ్లే అవకాశాలు కనిపిస్తున్నాయి. కాగా అంతకుముందే పీఆర్పీ తన శాసనసభ్యులకు విప్ జారీ చేసింది. ఈ నెల 17వ తేదిన ఎమ్మెల్యేలు అంతా అందుబాటులో ఉండాలని విప్ జారీ చేసింది. కాంగ్రెసు మద్దతుతో ప్రజారాజ్యం పార్టీ శాసనసభ్యుల కోటా కింద ఒక ఎమ్మెల్సీ సీటుకు పోటీ చేస్తోంది. సీనియర్ నాయకుడు సి. రామచంద్రయ్యను ప్రజారాజ్యం అభ్యర్థిగా నిలబెట్టింది. చాలా కాలంగా శోభానాగిరెడ్డి, కాటసాని రాంరెడ్డి వైయస్ జగన్‌కు మద్దతిస్తున్న విషయం తెలిసిందే.

English summary

PRP MLA Shobha Nagireddy said today that she will vote as her spiritual position in mlc election. She said she will vote in elections if PRP order whip or not.