అష్టలక్ష్మి సాక్షిగా ఆధిపత్యం కోసం ఇరు వర్గాల ఘర్షణ

హైదరాబాద్‌: హైదరాబాదులోని దిల్‌షుఖ్‌నగర్ సమీపంలో గల అష్టలక్ష్మి దేవాలయం పాలక మండలి చైర్మన్ పదవి కోసం బుధవారం ఇరు వర్గాలు ఘర్షణ పడ్డాయి. దీంతో పోలీసులు జోక్యం చేసుకోవాల్సి వచ్చింది. ఈ దేవాలయం ఇటీవలి కాలంలో హైదరాబాదులో విశేష ప్రాచుర్యాన్ని పొందింది. దీంతో పాలక మండలిపై ఆధిపత్యం కోసం ఈ ఘర్షణ చెలరేగినట్లు భావిస్తున్నారు. సుధాకర్ గుప్తా అనే వ్యక్తిని ఇటీవల చైర్మన్‌గా ఎన్నుకున్నారు. మూడు, నాలుగు రోజుల క్రితం పదవీ బాధ్యతలు కూడా స్వీకరించారు.

సుధాకర్ గుప్తాను తీవ్రంగా వ్యతిరేకిస్తూ అమరవాది లక్ష్మీనారాయణ వర్గం ఘర్షణకు దిగిందని చెబుతున్నారు. పాలక మండలి సభ్యులు దాదాపు 90 మంది ఉన్నారు. వీరిలో 63 మంది చైర్మన్ పదవి కోసం సుధాకర్ గుప్తాకు ఓటేశారని చెబుతున్నారు. మూడు నెలల క్రితం ఈ ఎన్నిక జరిగింది. అయితే, ఆయన మాత్రం ఇటీవలే ప్రమాణ స్వీకారం చేసుకున్నారు. బుధవారం ఉదయం లక్ష్మీనారాయణ వర్గం దేవాలయానికి చేరుకుని ఘర్షణకు దిగినట్లు సమాచారం. దీంతో ఆలయంలో తీవ్ర ఉద్రిక్తత నెలకొంది.

English summary

A clash took place between two groups of Ashta Laxmi temple administrative Council for chairman post. The clash took place between the groups of Sudhakar Gupta and Amaravadi Laxmi Narayana.