ముఖ్యమంత్రి కిరణ్ కుమార్ రెడ్డి మాట వినని జెసి దివాకర్ రెడ్డి?

హైదరాబాద్: అనంతపురం జిల్లా నుంచి స్థానిక సంస్థల కోటాలో జరుగుతున్న ఎన్నికల్లో ముఖ్యమంత్రి కిరణ్ కుమార్ రెడ్డి మాట వినడానికి కాంగ్రెసు శాసనసభ్యుడు జెసి దివాకర్ రెడ్డి విముఖత ప్రదర్శించినట్లు తెలుస్తోంది. కాంగ్రెసు అభ్యర్థి పాటిల్ వేణుగోపాల్ రెడ్డికి వ్యతిరేకంగా జెసి దివాకర్ రెడ్డి వర్గానికి చెందిన కాంగ్రెసు స్థానిక సంస్థల ప్రతినిధులు నిర్ణయించుకున్నారు. ఈ నేపథ్యంలో ముఖ్యమంత్రి కిరణ్ కుమార్ రెడ్డి గురువారం జెసి దివాకర్ రెడ్డితో సంప్రదింపులు జరిపారు.

కాంగ్రెసు అభ్యర్థికి స్థానిక సంస్థల ప్రజాప్రతినిధులు ఓటు వేసేలా చూడాలని ముఖ్యమంత్రి కిరణ్ కుమార్ రెడ్డి జెసి దివాకర్ రెడ్డికి సూచించినట్లు తెలుస్తోంది. ముఖ్యమంత్రి మాటలకు ఆయన తలొగ్గడానికి సిద్దంగా లేరని తెలుస్తోంది. పాటిల్ వేణుగోపాల్ రెడ్డి కాంగ్రెసు అభ్యర్థియేనా అని ఆయన అడిగినట్లు చెబుతున్నారు. అంతేకాకుండా స్థానిక సంస్థల ప్రజాప్రతినిధుల మనోభావాలకు అనుగుణంగా నడుచుకుంటానని ఆయన చెప్పినట్లు తెలుస్తోంది. పాటిల్ వేణుగోపాల్ రెడ్డి మాజీ పార్లమెంటు సభ్యుడు వైయస్ జగన్ మనిషి అని జెసి దివాకర్ రెడ్డి వాదిస్తున్నారు.