సిఎం కిరణ్‌కు చేదు అనుభవం: అపాయింట్‌మెంట్ కోసం వెయిటింగ్

న్యూఢిల్లీ: ముఖ్యమంత్రి కిరణ్ కుమార్ రెడ్డికి న్యూఢిల్లీలో గురువారం చేదు అనుభవం ఎదురయింది. ఉదయం హోంమంత్రి చిదంబరంతో భేటీ కావాల్సిన ఉన్న ముఖ్యమంత్రి కాస్త ఆలస్యంగా వెళ్లారు. దీంతో చిదంబరం భేటీని రద్దు చేసుకొని వెళ్లిపోయారు. ఆ తర్వాత ముఖ్యమంత్రి మధ్యాహ్నం వరకు ఖాళీగానే కూర్చోవలసిన పరిస్థితి ఏర్పడింది. కేంద్రమంత్రి గులాంనబీ ఆజాద్‌తో కలవాలని సిఎం అనుకున్నప్పటికీ ఆజాద్ తాను బిజీగా ఉన్నానని, ఖాళీ ఉన్నప్పుడు మాట్లాడుతానని చెప్పినట్టుగా తెలుస్తోంది. ఏఐసిసి అధ్యక్షురాలు సోనియాగాంధీ, అహ్మద్ పటేల్‌తో ముఖ్యమంత్రి అపాయింట్‌మెంట్ కూడా ఖరారు కాలేదు.

ముఖ్యమంత్రి కిరణ్ కుమార్ రెడ్డిపై పలువురు మంత్రులు కూడా గురువారం ఎమ్మెల్సీ ఎన్నికల ఓటమిపై ఫిర్యాదు చేసినట్టుగా వార్తలు వచ్చాయి. ప్రతిపక్ష టిడిపితో కాంగ్రెసు పార్టీ పొత్తు పెట్టుకోవడం వల్లనే ఓడిపోయిందంటూ సదరు మంత్రులు సిఎంపై ఫిర్యాదు చేసినట్టుగా తెలుస్తోంది. మధ్యాహ్నం వరకు ఖాళీగా ఉన్న సిఎం కిరణ్ మూడు గంటల ప్రాంతంలో కేంద్ర జల వనరుల మంత్రి సల్మాన్ ఖూర్షీద్‌ను కలిసేందుకు వెళ్లారు. ఈ సందర్భంగా ఎమ్మార్పీఎస్ కార్యకర్తలు ముఖ్యమంత్రిని అడ్డుకోబోగా వారిని పోలీసులు అదుపులోకి తీసుకున్నారు.