వైయస్ జగన్ వర్గం ఎమ్మెల్యేలపై వట్టి వసంత కుమార్ ఆగ్రహం

By Pratap

Published: Monday, March 28, 2011, 10:25 [IST]

హైదరాబాద్: శాసనసభలో జరిగిన ఘటనపై మంత్రి వట్టి వసంతకుమార్ సోమవారం మాజీ పార్లమెంటు సభ్యుడు వైయస్ జగన్ వర్గానికి చెందిన కాంగ్రెసు శాసనసభ్యులపై తీవ్ర ఆగ్రహం వ్యక్తం చేశారు. తన్నులాట తర్వాత సభ వాయిదా పడింది. సభ వాయిదా తర్వాత వసంతకుమార్‌కు, వైయస్ జగన్ వర్గానికి చెందిన శాసనసభ్యులకు మధ్య వాగ్వివాదం జరిగింది. ఈ సందర్భంగా వట్టి వసంతకుమార్ వారిపై తీవ్ర అసంతృప్తి వ్యక్తం చేశారు. వైయస్ రాజశేఖర రెడ్డి ప్రతిష్టను దెబ్బ తీస్తున్నారంటూ ఆయన మండిపడ్డారు.

కాగా, శాసనసభ లోపల జరిగిన ఘటన తర్వాత లాబీల్లో ఉద్రిక్త వాతావరణం నెలకొంది. గతంలో ఎన్నడూ లేని విధంగా ముష్టియుద్ధం జరగడం దిగ్భ్రాంతికి గురి చేసింది. మంత్రి వైయస్ వివేకానంద రెడ్డిపై, జగన్ వర్గం శాసనసభ్యులపై తెలుగుదేశం పార్టీ శాసనసభ్యులు తీవ్రంగా మండిపడ్డారు. వైయస్ జగన్ వర్గానికి చెందిన శ్రీకాంత్ రెడ్డి, మరికొందరు శాసనసభ్యులు బూతులు తిట్టారని తెలుగుదేశం శాసనసభ్యుడు బొజ్జల గోపాలకృష్ణా రెడ్డి చెప్పారు.

Published On March 28, 2011