బాబాయ్ వివేకా, అబ్బాయ్ జగన్‌కు పరీక్ష: మే 8న ఉప ఎన్నికలు

న్యూఢిల్లీ: మాజీ పార్లమెంటు సభ్యుడు, వైయస్ఆర్ కాంగ్రెసు పార్టీ అధ్యక్షుడు జగన్మోహన్ రెడ్డికి పరీక్ష ప్రారంభమయింది. కడప పార్లమెంటు, పులివెందుల శాసనసభ ఉప ఎన్నికలకు కేంద్ర ఎన్నికల సంఘం తేదిలను ఖరారు చేసింది. మే నెల 8వ తారీఖున కడప, పులివెందుల ఉప ఎన్నికలు నిర్వహిస్తారు. ఏప్రిల్ 11వ తేదిన ఎన్నికల సంఘం నోటిఫికేషన్ విడుదల చేయనుంది. 13వ తేది నుండి 18వ తేది వరకు నామినేషన్లు స్వీకరిస్తారు. 19న నామినేషన్ల పరిశీలన ఉంటుంది. 21 వరకు ఉపసంహరణకు అవకాశం ఉంటుంది. అనంతరం మే 8వ తేదిన ఎన్నికలు నిర్వహిస్తారు. అదే నెల 13వ తారీఖున ఒట్ల లెక్కింపు జరుగుతుంది.

అయితే కేంద్ర ఎన్నికల సంఘం కడప, పులివెందుల ఉప ఎన్నికలతో పాటు ఉత్తర ప్రదేశ్, నాగాలాండు, చత్తీస్‌ఘడ్‌కు చెందిన ఉప ఎన్నికలు కూడా నిర్వహించనుంది. కాగా కడప ఎంపీ స్థానానికి జగన్, పులివెందుల శాసనసభ్యత్వానికి దివంగత వైయస్ సతీమణి విజయమ్మ గత సంవత్సరం అనగా 2010 నవంబర్ 29న రాజీనామా చేశారు. అప్పటినుండి ఆ నియోజకవర్గాలు ఖాళీ ఉన్నాయి. అయితే తమిళనాడు, పుదుచ్చేరి, కేరళ, పశ్చిమబెంగాల్, అసోం రాష్ట్రాల సాధారణ ఎన్నికల కారణంగా కాస్త ఆలస్యమయినట్లుగా తెలుస్తోంది. ఆయా రాష్ట్రాల సాధారణ ఎన్నికల షెడ్యూల్ విడుదల అయిన తర్వాత సిఈసి ఉప ఎన్నికల కోసం తేదీలను ఖరారు చేసింది.

English summary

Ex MP YS Jaganmohan Reddy will face soon by election challenge. CEC released election date of Kadapa and Pulivendula by election. Election will held on May 8th, counting will be on 13th.