అవినీతిపై పోరు, ఢిల్లీలో అన్నా హజారే ఆమరణ నిరాహార దీక్ష

By Pratap

Published: Tuesday, May 29, 2012, 10:43 [IST]

న్యూఢిల్లీ: అవినీతిని అరికట్టడానికి సమగ్రమైన జన్ లోక్‌పాల్ బిల్లును ప్రతిపాదించాలని డిమాండ్ చేస్తూ సామాజిక కార్యకర్త అన్నా హజారే మంగళవారం ఆమరణ నిరాహార దీక్షను ప్రారంభించారు. మహాత్మా గాంధీకి రాజ్‌ఘాట్ వద్ద నివాళులు అర్పించి అనంతరం జంతర్ మంతర్ వరకు ప్రదర్శన నిర్వహించారు. అక్కడ 72 ఏళ్ల హజారే ఆమరణ నిరాహార దీక్ష ప్రారంభించారు. దేశంలోని అవినీతిని అరికట్టడానికి అవసరమైన జన్ లోక్‌పాల్ బిల్లును ప్రతిపాదించే వరకు తన దీక్ష సాగుతుందని ఆయన చెప్పారు.

హజారేకు మద్దతుగా స్వామి అగ్నివేశ్, కిరణ్ బేడీ, సందీప్ పాండే కూడా అక్కడికి చేరుకున్నారు. జన్ లోక్‌పాల్ బిల్లు ముసాయిదా తయారీకి సీనియర్ మంత్రులతో వేసిన కమిటీలో పౌర సమాజం ప్రముఖులను చేర్చాలనే తన డిమాండ్‌ను ప్రధాని మన్మోహన్ సింగ్ అంగీకరించకపోవడం విచారకరమని ఆయన అన్నారు. రిటైర్డ్ జస్టిస్ సంతోష్ హెగ్డే, న్యాయవాది ప్రశాంత్ భూషణ్, అగ్నివేష్ వంటి ప్రముఖుల అభిప్రాయాలను కూడా ప్రభుత్వం పట్టించుకోవడం లేదని ఆయన అన్నారు. మహారాష్ట్రలో భారీ భూములు ఉన్న శరద్ పవార్ వంటి మంత్రి ఆ కమిటీకి నేతృత్వం వహించడం విచారకరమని ఆయన అన్నారు.

Published On May 29, 2012