ఉండవల్లి అరుణ్ కుమార్‌పై వైయస్ జగన్ వర్గం నేతల ఎదురుదాడి

By Pratap

Published: Monday, April 11, 2011, 14:14 [IST]

హైదరాబాద్ : తమ నాయకుడు వైయస్ జగన్‌ను వ్యతిరేకించిన కాంగ్రెసు పార్లమెంటు సభ్యుడు ఉండవల్లి అరుణ్ కుమార్‌పై వైయస్సార్ కాంగ్రెసు నాయకులు ఎదురుదాడికి దిగారు. అంబటి రాంబాబు, గోనె ప్రకాశ రావు, గట్టు రామచంద్ర రావు సోమవారం మీడియా ప్రతినిధుల సమావేశాల్లో ఉండవల్లిపై విరుచుకుపడ్డారు. చరిత్ర ఉండవల్లికే కాదని, తమకు కూడా తెలుసునని గోనె ప్రకాశరావు ఎద్దేవా చేశారు.ఉండవల్లికి దమ్ముంటే వైఎస్ జగన్‌మోహన్‌రెడ్డిపై చేసిన ఆరోపణలపై బహిరంగ చర్చకు రావాలని సవాల్ విసిరారు. ఉండవల్లికి చిత్తశుద్ధి ఉంటే ఎంపీ పదవికి రాజీనామా చేసి వైయస్సార్ ఫొటో లేకుండారాజమండ్రిలో మళ్లీ గెలవాలన్నారు.

ఉండవల్లి దగ్గర ఎన్ని సాక్ష్యాలు ఉన్నాయో అంతకంటే తమ దగ్గర ఎక్కువ సాక్ష్యాలున్నాయన్నారు. వాటిని ఉండవల్లి ముందు బయటపెడితే తాము కూడా బయటపెడతామని గోనె డిమాండ్ చేశారు. వైఎస్ జగన్‌మోహన్‌రెడ్డిని దోషిగా నిలబెట్టేందుకు మోసపూరిత కుట్ర జరుగుతోందని ఆయన ఆరోపించారు. ఆ కుట్రలో భాగంగానే ఉండవల్లి ఆరోపణలు చేస్తున్నారని గోనె మండిపడ్డారు. వైయస్సార్ ప్రాంతీయ పార్టీ పెట్టడానికి ప్రయత్నించినప్పుడు ఉండవల్లి సహకరించారని ఆయన అన్నారు. ఉండవల్లి సిగ్గుమాలిన వ్యాఖ్యలు మానుకోవాలని అంబటి రాంబాబు సూచించారు.

Published On April 11, 2011