నాగం జనార్ధన్ రెడ్డికి జగన్, జైపాల్ రెడ్డి సూచనలు: రేవంత్ రెడ్డి

By Srinivas

Published: Sunday, May 15, 2011, 15:17 [IST]

మహబూబ్‌నగర్: ప్రత్యేక తెలంగాణ రాష్ట్రం కోసం పోరాడే వారిని తెలంగాణ రాష్ట్ర సమితి అధ్యక్షుడు కె చంద్రశేఖరరావు కించపరుస్తున్నారని తెలుగుదేశం పార్టీ యువ శాసనసభ్యుడు రేవంత్ రెడ్డి ఆదివారం విమర్శించారు. గతంలో ఏఐసిసి అధ్యక్షురాలు సోనియాగాంధీతో కుమ్మక్కైన కెసిఆర్ ఉద్యమాన్ని నీరుగార్చారని ఆరోపించారు. ఉద్యమం పేరుతో మరో కుట్రతో కెసిఆర్ ప్రజల ముందుకు రావడానికి సిద్ధంగా ఉన్నారని హెచ్చరించారు. స్వార్థ రాజకీయ నాయకులను తెలంగాణ జెఏసి పక్కన పెట్టాలని సూచించారు.

వైయస్ఆర్ కాంగ్రెసు పార్టీ అధ్యక్షుడు వైయస్ జగన్మోహన్ రెడ్డి, కేంద్రమంత్రి జైపాల్ రెడ్డి సూచనల మేరకు కొందరు పని చేస్తున్నారని టిడిపి ఎమ్మెల్యే నాగం జనార్ధన్ రెడ్డిని ఉద్దేశించి పరోక్షంగా వ్యాఖ్యానించారు. కొందరు కుట్రలో భాగంగానే జెండాలు పక్కన పెట్టి తెలంగాణ ఉద్యమం చేస్తున్నారని ఆరోపించారు. మేం కూడా జెండాలు పక్కన పెట్టి ఉద్యమం చేస్తామని అన్నారు. మాతో పాటు అన్ని పార్టీల వారు జెండాలు పక్కన పెట్టి పోరాటం చేస్తేనే అందుకు మేం సిద్ధమని చెప్పారు.

Published On May 15, 2011