ప్రజాస్వామ్యం పట్టని గవర్నర్‌ను రీకాల్ చేయాలి: యెడ్యూరప్ప

బెంగుళూరు: ప్రజాస్వామ్యంపై విశ్వాసం లేని కర్ణాటక గవర్నర్ హెచ్ఆర్ భరద్వాజ్‌ను కేంద్రం వెంటనే రీకాల్ చేయాలని ఆ రాష్ట్ర ముఖ్యమంత్రి యెడ్యూరప్ప సోమవారం డిమాండ్ చేశారు. ఎమ్మెల్యేలంతా కలిసి సోమవారం, లేదా మంగళవారం కానీ రాష్ట్రపతి ప్రతిభా పాటిల్‌ని కలిసి గవర్నర్‌ని రీకాల్‌ చేయాలని కోరతామని ఆయన చెప్పారు. రాష్ట్రపతి పాలనకు సిఫార్సు చేసిన గవర్నర్‌ చర్య రాజకీయ ప్రేరేపితం అని ఆయన అభిప్రాయపడ్డారు. గవర్నర్‌ భరద్వాజ్‌కి వ్యతిరేకంగా కర్ణాటక అధికార పక్షానికి చెందిన ఎమ్మెల్యేలు మధ్యాహ్నం 12 గంటలకు రాజ్‌భవన్‌ ఎదుట ఆందోళన చేపట్టనున్న విషయం తెలిసిందే.

అనంతరం మధ్యాహ్నం ఒంటిగంటకు రాష్ట్ర మంత్రివర్గ అత్యవసర సమావేశం కూడా జరగనుంది. రాష్ట్రపతి పాలనకు కేంద్రానికి భరద్వాజ్ సూచించడంతో యెడ్యూరప్ప కూడా ఆయనతో తాడోపేడో తేల్చుకోవడానికి సిద్థమయ్యారు. తన బలాన్ని నిరూపించుకునేందుకు ఈరోజు మధ్యాహ్నాం 12 గంటలకు సీఎంతో పాటు, మంత్రులు, ఎమ్మెల్యేలు రాజ్‌భవన్ ఎదుట ధర్నాకు దిగనున్నారు. గవర్నర్ తీరును నిరసిస్తూ యెడ్యూరప్ప ఇప్పటికే కేంద్రానికి, రాష్ట్రపతికి లేఖ కూడా రాశారు. న్యాయశాఖ మంత్రిగా పని చేసిన గవర్నర్ ప్రజాస్వామ్యంపై నమ్మకం లేని వ్యకిగా ప్రవర్తిస్తున్నారని ఆరోపించారు. కర్ణాటకలో ప్రభుత్వాన్ని ఇబ్బందులలోకి నెట్టే దిశలో ప్రతిపక్షాలు ప్రయత్నాలు చేస్తున్నాయన్నారు. కాగా కర్ణాటక పరిస్థితులపై మాజీ ఉప ప్రధాని ఎల్‌కే అద్వానీ నేతృత్వంలో ఎన్డీయే సమావేశం కానుంది. కర్ణాటక పరిస్థితులపై చర్చించనుంది.

English summary

The crisis in Karnataka appeared to be snowballing into a major controversy on Monday after Chief Minister BS Yeddyurappa announced that all BJP MLAs would sit on a dharna outside the Raj Bhavan against the Governor’s move to recommend the imposition of President's rule in the state.