ఆజాద్ వద్దకు సింగిల్ పాయింట్‌తో వెళ్లాం, తెలంగాణ కోసం రాజీనామాకు సిద్ధం

By Srinivas

Published: Tuesday, May 17, 2011, 11:28 [IST]

హైదరాబాద్: కేంద్రమంత్రి, రాష్ట్ర వ్యవహారాల ఇంఛార్జ్ గులాం నబీ ఆజాద్‌ను తెలంగాణ మంత్రులు, ఎంపీలు మంగళవారం కలిశారు. ఆజాద్‌ను కలిసిన అనంతరం వారు విలేకరులతో మాట్లాడారు. ఆజాద్‌ను కలిసిన వారిలో ఎంపీ కోమటిరెడ్డి రాజగోపాల్ రెడ్డి, మంత్రులు సారయ్య, దామోదర రాజనర్సింహ తదితరులు ఉన్నారు. తెలంగాణ విషయంలో పార్టీ అధిష్టానానికి ఎలాంటి డెడ్ లైన్లు విధించమని, అయితే త్వరగా నిర్ణయం తీసుకోమని ఆజాద్‌కు చెప్పినట్టు ఎంపీ కోమటిరెడ్డి చెప్పారు. కేంద్రం వెంటనే తెలంగాణపై స్పష్టమైన నిర్ణయం తీసుకోవాలి. పార్లమెంటులో తెలంగాణ బిల్లు ప్రవేశ పెట్టాలి. లేదంటే పార్లమెంటును స్తంభింప జేస్తామని హెచ్చరించారు. కేంద్రానికి ఇచ్చిన ఐదు రాష్ట్రాల ఎన్నికల గడువు కూడా ముగిసిందని చెప్పారు.

తెలంగాణపై కాలాయపన చేస్తే ప్రజలు ఊరుకోరన్నారు. జూన్ రెండో వారంలోగా తెలంగాణపై నిర్ణయం తీసుకోకుంటే రాజీనామాలకు సిద్ధం అని చెప్పారు. కేంద్రం డిసెంబర్ 9న చేసిన ప్రకటనకు కట్టుబడి ఉండాలని తాము ఆజాద్‌కు చెప్పినట్టు మంత్రి బస్వరాజు సారయ్య చెప్పారు. తెలంగాణ ఆందోళకు విద్యార్థులు, ఉద్యోగులు, ఉపాధ్యాయులు అందరి మద్దతు ఉన్న విషయాన్ని ఆజాద్ దృష్టికి తీసుకు వచ్చినట్టు చెప్పారు. తాము ఆజాద్‌ను తెలంగాణ అనే ఒకే ఒక పాయింట్‌తో కలిశామని చెప్పారు. కాగా జగన్‌కు తెలంగాణ అంశానికి సంబంధం లేదన్నారు. అయితే జగన్‌తో వెళ్లిన ఎమ్మెల్యేల వైఖరిని మాత్రం ఆయన తప్పు పట్టారు. పార్టీలో క్రమశిక్షణ తప్పుతోందన్నారు.

Published On May 17, 2011