టిడిపి కరీంనగర్ రణభేరీ సమైక్యాంధ్రుల కుట్ర: కోదండరామ్

హైదరాబాద్‌: సమైక్యాంధ్రుల కుట్రలో భాగంగానే తెలుగుదేశం తెలంగాణ ఫోరం కరీంనగర్‌లో తెలంగాణ రణభేరీ బహిరంగ సభను తలపెట్టిందని తెలంగాణ రాజకీయ జెఎసి చైర్మన్ కోదండరామ్ వ్యాఖ్యానించారు. తెలంగాణ ప్రజలపైనే తెలుగుదేశం తెలంగాణ నాయకులు రణభేరీ మోగిస్తున్నారని ఆయన బుధవారం మీడియా ప్రతినిధుల సమావేశంలో ఆరోపించారు. తెలుగుదేశం రణభేరీకి ప్రజల సహకరించవద్దని ఆయన కోరారు. తెలంగాణపై స్పష్టమైన వైఖరి ప్రకటించకుంటే ప్రజల్లో విశ్వసనీయత ఉండదని ఆయన అన్నారు.

తెలుగుదేశం పార్టీ శానసభ్యుడు నాగం జనార్దన్ రెడ్డిపై జెఎసి సమావేశంలో చర్చించి నిర్ణయం తీసుకుంటామని ఆయన చెప్పారు. కుంటాల జలపాతంపై సీమాంధ్రుల జల విద్యుత్కేంద్రం నిర్మాణాన్ని అడ్డుకుంటామని ఆయన హెచ్చరించారు. తెలంగాణపై తెలుగుదేశం పార్టీ అధ్యక్షుడు నారా చంద్రబాబు నాయుడు స్పష్టమైన వైఖరి ప్రకటించాలని తెలంగాణ ప్రజా ఫ్రంట్ అధ్యక్షుడు గద్దర్ విడిగా డిమాండ్ చేశారు. కరీంనగర్‌లో బుధవారం తెలుగుదేశం తెలంగాణ ఫోరం తలపెట్టిన తెలంగాణ రణభేరీ బహిరంగ సభను అడ్డుకుంటామని ఒయు, కాకతీయ విశ్వవిద్యాలయాల విద్యార్థులు ప్రకటించారు. ముందస్తు జాగ్రత్తగా పోలీసులు పలువురిని అరెస్టు చేశారు.

English summary

Telangana political JAC chairman Kodandaram said that as a part of united Andhrites conspiracy, TDP Telangana forum is organizing public meeting at Karimnagar.