హైదరాబాదులో సుష్మా స్వరాజ్‌కు అవమానం, బిజెపి నేతల ఆగ్రహం

By Pratap

Published: Tuesday, May 31, 2011, 16:56 [IST]

హైదరాబాద్: ప్రతిపక్ష నేత, బిజెపి నాయకురాలు సుష్మా స్వరాజ్‌కు రాష్ట్రంలో అవమానం జరిగింది. సుష్మా స్వరాజ్ హైదరాబాదు రాక సందర్భంగా మంగళవారం రాష్ట్ర ప్రభుత్వం ప్రోటోకాల్ పాటించలేదు. కరీంనగర్‌లో తెలంగాణ సభకు హాజరు కావడానికి ఆమె హైదరాబాదు వచ్చారు. ఆమెకు ఇవ్వాల్సిన ఎస్కార్టును, పైలట్‌ను ఇవ్వలేదు. ప్రభుత్వ అతిథి గృహం లేక్‌వ్యూలో ఆమెను పేయింగ్ గెస్ట్ జాబితాలో చేర్చారు. ఎస్కార్టు వాహనం కావాలని అడిగితే కిలోమీటరుకు వేయి రూపాయలు ఇవ్వాలని అధికారులు చెప్పారు. దీనిపై రాష్ట్ర బిజెపి నాయకులు తీవ్ర ఆగ్రహం వ్యక్తం చేస్తున్నారు.

ప్రతిపక్ష నేత అయిన సుష్మా స్వరాజ్‌కు కేబినెట్ హోదా ఉంది. ఆమె పర్యటన వివరాలు ఢిల్లీ నుంచి రాష్ట్ర ప్రభుత్వానికి అందాల్సి ఉంటుంది. ఆ ప్రకారం రాష్ట్ర ప్రభుత్వం ఆమెకు అన్ని సౌకర్యాలు కల్పించాల్సి ఉంటుంది. అయితే రాష్ట్ర ప్రభుత్వం ఆమె పర్యటనను లెక్కలోకి కూడా తీసుకున్నట్లు లేదు. సుష్మా స్వరాజ్ విమానాశ్రయం నుంచి బిజెపి రాష్ట్రాధ్యక్షుడు జి. కిషన్ రెడ్డి వాహనంలోనే లేక్‌వ్యూ అతిథి గృహానికి చేరుకున్నారు. మధ్యలో ట్రాఫిక్ జామ్ అయినా పట్టించుకున్నవారు లేరు. సుష్మా స్వరాజ్‌కు కనీస భద్రతను కూడా అధికారులు కల్పించలేదు.

Published On May 31, 2011