అవిశ్వాసంతో తెలంగాణ కాంగ్రెసు ఎమ్మెల్యేలపై పెరిగిన ఒత్తిడి

By Srinivas

Published: Friday, June 3, 2011, 11:27 [IST]

హైదరాబాద్: ప్రతిపక్ష తెలుగుదేశం పార్టీ అధినేత నారా చంద్రబాబునాయుడు తీసుకున్న అవిశ్వాస తీర్మానం తెలంగాణ కాంగ్రెసు ప్రజాప్రతినిధులను ముప్పు తిప్పలు పెడుతోంది. టిడిపి అవిశ్వాసం తీర్మానం నిర్ణయం తీసుకున్న కారణంగా తెలంగాణ కాంగ్రెసు ఎమ్మెల్యేలు ప్రభుత్వానికి వ్యతిరేకంగా ఓటు వేయాలని తెలంగాణవాదులు కోరుతున్నారు. లేదంటే తెలంగాణ ద్రోహులుగా మిగిలి పోతారని హెచ్చరిస్తున్నారు. ప్రత్యేక రాష్ట్రానికి వ్యతిరేకంగా ఉన్న కాంగ్రెసు ప్రభుత్వంపై తెలంగాణ ఎమ్మెల్యేలు వచ్చిన అవిశ్వాసం పేరుతో వచ్చిన అవకాశాన్ని ఉపయోగించుకోవాలని తెలంగాణ రాజకీయ ఐక్య కార్యాచరణ సమితి చైర్మన్ కోదండరామ్ కోరారు.

ప్రభుత్వానికి వ్యతిరేకంగా అవిశ్వాసంలో ఓటు వేయాలని కోరారు. స్థానిక ప్రజలు కూడా ఆయా ఎమ్మెల్యేలపై ప్రభుత్వ వ్యతిరేక ఓటుకు ఒత్తిడి తీసుకు రావాలన్నారు. తెలంగాణ అంశంపై తెలంగాణ ఎమ్మెల్యేలు అవిశ్వాసం పెట్టాలని తెలంగాణ ఫ్రంట్ చైర్మన్ గద్దర్ కూడా కోరారు. తెలంగాణను కేంద్ర బిందువుగా అవిశ్వాస తీర్మానం పెట్టాలని ఆయన ఎమ్మెల్యేలను కోరారు. తెలుగుదేశం పార్టీ అధినేత చంద్రబాబునాయుడు అవిశ్వాసం పేరిట తెలంగాణ అంశాన్ని పక్కదారి పట్టించడానికి కుట్ర చేస్తున్నారని ఆరోపించారు.

అవిశ్వాస తీర్మానంలో ప్రభుత్వానికి వ్యతిరేకంగా ఓటు వేస్తానని టిఆర్ఎస్ సస్పెండెడ్ శాసనసభ్యుడు కావేటి సమ్మయ్య అన్నారు. కాంగ్రెసు తెలంగాణ ఎమ్మెల్యేలకు తెలంగాణపై తమ చిత్తశుద్ధి నిరూపించుకోవాల్సిన సమయం వచ్చిందన్నారు. తెలంగాణ కాంగ్రెసు ఎమ్మెల్యేలు ప్రభుత్వానికి వ్యతిరేకంగా ఓటు వేయకుంటే ప్రజలు వారిని నమ్మరని మాజీ ఎంపీ, టిఆర్ఎస్ నేత వినోద్ కుమార్ అన్నారు. వారు తెలంగాణ వ్యతిరేక కాంగ్రెసు ప్రభుత్వానికి వ్యతిరేకంగా ఓటు వేయాలన్నారు.

Published On June 3, 2011