బయట పెట్టడానికి ప్రణబ్ ముఖర్జీ సిగ్గు పడుతున్నారు: వెంకయ్య

By Srinivas

Published: Monday, June 6, 2011, 16:59 [IST]

తిరుపతి: కేంద్ర మంత్రి ప్రణబ్ ముఖర్జీ నల్లధన కుబేరుల పేర్లు బయటకు చెప్పడానికి సిగ్గు పడుతున్నట్టున్నారని భారతీయ జనతా పార్టీ జాతీయ నాయకులు వెంకయ్యనాయుడు సోమవారం తిరుపతిలో విలేకరులతో మాట్లాడుతూ విమర్శించారు. నల్లధనం కుబేరుల పేర్లు బయట పెట్టాలని సుప్రీం కోర్టు ఆదేశాలు జారీ చేసినప్పటికీ కేంద్ర ప్రభుత్వం మాత్రం వారి పేర్లు బయటకు చెప్పకుండా దాచి పెడుతోందని ఆరోపించారు. కేంద్రం వెంటనే నల్లధన కుబేరుల పేర్లు బయట పెట్టాలని ఆయన డిమాండ్ చేశారు. నల్లధనం వెలికి తీస్తే దేశంలో పేదవాడు అనే వాడు ఉండడని ఆయన అభిప్రాయపడ్డారు.

కేంద్ర ప్రభుత్వం అవినీతిపై చర్యలు చేపట్టడం లేదన్నారు. కేంద్రం తీరు అవినీతికి మద్దతు పలికే విధంగా ఉందన్నారు. కాంగ్రెసు పార్టీ అవినీతిని సమర్థిస్తున్నప్పుడు అవినీతిపై సమర భేరీ మోగించిన యోగా గురువు బాబా రామ్‌దేవ్‌కు దేశ భక్తి కలిగిన ఆరెస్సెస్ మద్దతిస్తే తప్పేమిటని ప్రశ్నించారు. అవినీతిపై దీక్ష చేసిన అన్నాహజారేను కూడా కేంద్ర ప్రభుత్వం మోసం చేసిందని ఆరోపించారు.

Published On June 6, 2011