రాజధానిలో పట్టపగలు వేట కొడవళ్లతో నరికి యువకుడి హత్య

By Srinivas

Published: Saturday, June 11, 2011, 11:50 [IST]

హైదరాబాద్: రాజధానిలో పట్టపగలే వేట కొడవళ్లతో నరికి ఓ యువకుడిని దారుణంగా హత్య చేసిన సంఘటన శనివారం మధ్యాహ్నం చోటు చేసుకుంది. హైదర్‌గూడలోని రాంనరేష్‌నగర్ నివాసి అయిన అశోక్ శనివారం మధ్యాహ్నం నిజాంపేట మీదుగా ద్విచక్ర వాహనంపై వెళుతుండగా పలువురు దుండగులు వచ్చి ఆయనను బైక్ నుండి తోసి వేసి వేట కొడవళ్లతో దారుణంగా నరికి చంపారు. ప్రత్యర్థుల దాడిలో అశోక్ సంఘటనా స్థలంలోనే మృతి చెందారు.

విషయాన్ని స్థానికులు కంట్రోల్ రూంకు సమాచారం అందించారు. సమాచారం అందుకున్న పోలీసులు సంఘటనా స్థలాన్ని పరిశీలించారు. అయితే అశోక్‌పై దాడి చేసి చంపింది ఎవరు అనే విషయంపై పోలీసులు అప్పుడే చెప్పలేమంటున్నారు. విచారణ అనంతరం నిందితులను పట్టుకుంటామని చెప్పారు. అయితే పాతకక్షల కారణంగానే హత్య చేయవచ్చని పోలీసులు అనుమానిస్తున్నారు. ఎందుకు చంపారో కూడా కారణాలు తెలియరాలేదు. కాగా అశోక్ ఒంగోలు జిల్లా వాసి. కొంత కాలం క్రితం తన తల్లిదండ్రులతో హైదరాబాదు వచ్చిన అశోక్ వ్యాపారం చేసుకుంటున్నట్టుగా తెలుస్తోంది.

Published On June 11, 2011