సోనియా గాంధీని వైయస్ జగన్ బ్లాక్ మెయిల్ చేస్తున్నాడు: చంద్రబాబు

By Srinivas

Published: Wednesday, June 15, 2011, 14:42 [IST]

హైదరాబాద్: వైయస్ఆర్ కాంగ్రెసు పార్టీ అధ్యక్షుడు వైయస్ జగన్మోహన్ రెడ్డి ఏఐసిసి అధ్యక్షురాలు సోనియాగాంధీని బ్లాక్ మెయిల్ చేస్తున్నాడని తెలుగుదేశం పార్టీ అధినేత నారా చంద్రబాబునాయుడు బుధవారం ఆరోపించారు. తెలుగుదేశం పార్టీ మేథోమధనం రెండు రోజుల కార్యక్రమంలో భాగంగా బుధవారం రెండో రోజు చంద్రబాబు పార్టీ నేతలను ఉద్దేశించి మాట్లాడారు. సోనియాకు డబ్బులిచ్చానని జగన్ బ్లాక్ మెయిల్ చేస్తుండటం వల్లనే ఆయన వర్గం ఎమ్మెల్యేలపై కాంగ్రెసు పార్టీ చర్యలు తీసుకోవడం లేదని ఆరోపించారు. తెలంగాణ రాష్ట్ర సమితి పార్టీ ఉద్యమం పేరుతో గెలుపొంది ఆ తర్వాత అమ్ముడు పోతుందన్నారు.

రాష్ట్రంలో అసమర్థ కాంగ్రెసు పాలన నడుస్తుందన్నారు. టిడిపి హయాంలో రాష్ట్రాన్ని జాతీయస్థాయిలో అన్ని విషయాల్లో అగ్రస్థానంలో నిలబెట్టామని చెప్పారు. అవినీతి వల్ల రాజకీయ పార్టీలపై ప్రజలకు నమ్మకం పోతోందని ఆయన ఆవేదన వ్యక్తం చేశారు. రైతులకు ప్రభుత్వం మద్దతు ధర ప్రకటించాలన్నారు. వెనుకబడిన వర్గాలకు తెలుగుదేశం పార్టీతోనే గుర్తింపు వచ్చిందన్నారు. అవినీతీపే ఆందోళన చేస్తున్న అన్నా హజారే, బాబా రాందేవ్‌లపై విమర్శలు మానుకోవాలని ఆయన కేంద్రాన్ని హెచ్చరించారు. అవినీతిపై జాతీయస్థాయిలో ఉద్యమాన్ని చేపడతామని అన్నారు.

Published On June 15, 2011