నాగం జనార్దన్ రెడ్డిపై ధ్వజమెత్తిన టిడిపి ఎమ్మెల్యే రేవంత్ రెడ్డి

హైదరాబాద్: తమ పార్టీ అధ్యక్షుడు నారా చంద్రబాబు నాయుడిపై తీవ్ర వ్యాఖ్యలు చేసిన శాసనసభ్యుడు నాగం జనార్దన్ రెడ్డిపై తెలుగుదేశం తెలంగాణ ప్రాంత శాసనసభ్యుడు రేవంత్ రెడ్డి ధ్వజమెత్తారు. మీరు ఎవరినైతే నమ్మి బయటకు వెళ్లారో వారు మిమ్మల్ని నమ్మడం లేదని, వారిని నమ్మించడానికి మీరు మాపై తీవ్ర విమర్శలు చేస్తున్నారని ఆయన నాగం జనార్దన్ రెడ్డిని ఉద్దేశించి బుధవారం మీడియా ప్రతినిధుల సమావేశంలో అన్నారు. తెలంగాణపై తమ పార్టీ స్పష్టమైన వైఖరిని వెల్లడించిందని ఆయన అన్నారు.

నాగం జనార్దన్ రెడ్డి 1969లో తెలంగాణవాది, 2004లో సమైక్యావాది అయి, 2008లో తెలంగాణవాది ఎలా అయ్యారో చెప్పాలని ఆయన అన్నారు. తెలంగాణ అనుకూలంగా తమ పార్టీ ప్రణబ్ ముఖర్జీ కమిటీకి లేఖ ఇచ్చిందని, అఖిల పక్ష సమావేశంలోనూ అదే విషయం చెప్పిందని, శ్రీకృష్ణ కమిటీకి కూడా నివేదిక ఇచ్చిందని ఆయన చెప్పారు. శ్రీకృష్ణ కమిటీ నివేదిక సమర్పించిన తర్వాత ఏర్పాటైన అఖిల పక్ష సమావేశానికి వెళ్లకూడదని నాగం జనార్దన్ రెడ్డే చెప్పారని, ఆ మేరకే పార్టీ నిర్ణయం తీసుకుందని ఆయన చెప్పారు.

English summary

TDP Telangana region MLA Revanth Reddy retaliated suspended TDP MLA Nagam Janardhan Reddy.