వైయస్ జగన్ వర్గం ఎమ్మెల్యేలకు చిరంజీవి రాజీనామాల సవాల్

తిరుపతి: విలువలుంటే వైయస్సార్ కాంగ్రెసు పార్టీ అధ్యక్షుడు వైయస్ జగన్ వెంట వెళ్తున్న తమ పార్టీ శాసనసభ్యులు రాజీనామా చేసి, తిరిగి పోటీ చేసి గెలవాలని కాంగ్రెసు పార్టీ నాయకుడు చిరంజీవి సవాల్ చేశారు. కాంగ్రెసు పార్టీ తరఫున గెలిచి మరో పార్టీకి చెందిన నాయకుడి వెంట వెళ్లడం అనైతికమని ఆయన గురువారం మీడియా ప్రతినిధులతో అన్నారు. తెలంగాణ విషయంలో తాను శ్రీకృష్ణ కమిటీ నివేదికకు కట్టుబడి ఉన్నానని ఆయన చెప్పారు. తెలంగాణపై కాంగ్రెసు పార్టీ అధిష్టానం తీసుకునే నిర్ణయానికి కట్టుబడి ఉంటానని, పార్టీ నాయకులంతా దానికి కట్టుబడి ఉండాలని ఆయన అన్నారు. పార్టీ స్థాపించిన తిరుపతిలోనే విలీన సభ జరగాలనేది తన కోరిక అని, అయితే అధిష్టానం నిర్ణయానికి కట్టుబడి ఉంటానని ఆయన చెప్పారు.

అవినీతి లేని రాజకీయం లేదని ఆయన అన్నారు. రాహుల్ గాంధీ నేతృత్వంలో అవినీతి ప్రక్షాళన జరుగుతుందని ఆశిస్తున్నట్లు ఆయన తెలిపారు. కేంద్రం ప్రధాన కాదని, రాష్ట్రమే ప్రధానమని ఆయన అన్నారు. అవినీతికి బాధ్యత కాంగ్రెసు పార్టీది కాదని, యుపిఎ మిత్రపక్షాలదని ఆయన అన్నారు. రాజకీయాలు అంతులేని కథ అని ఆయన వ్యాఖ్యానించారు. ప్రజారాజ్యం పార్టీకి ఎన్నికల్లో 180 సీట్లు వస్తాయనుకుంటే 18 సీట్లు వచ్చాయని ఆయన అన్నారు. గత రెండు రోజులుగా చిరంజీవి తిరుపతిలో పర్యటిస్తున్నారు.

English summary

Congress MLA Chiranjeevi challenged to resign YSR Congress president YS Jagan camp MLAs.