తెలంగాణకు సై అంటే జగన్‌కు జై కొడ్తాం: నాగం జనార్దన్ రెడ్డి స్పష్టం

By Pratap

Published: Monday, June 27, 2011, 14:30 [IST]

హైదరాబాద్: తెలంగాణకు అనుకూలంగా నిర్ణయం తీసుకుంటే తెలంగాణ ప్రాంతంలో వైయస్సార్ కాంగ్రెసు పార్టీ అధ్యక్షుడు వైయస్ జగన్‌ను ఆదరిస్తామని తెలుగుదేశం పార్టీ నుంచి సస్పెన్షన్‌కు గురైన శాసనసభ్యుడు నాగం జనార్దన్ రెడ్డి చెప్పారు. తెలంగాణ జర్నలిస్టుల ఫోరం సోమవారం ఏర్పాటు చేసిన మీట్ ద ప్రెస్ కార్యక్రమంలో ఆయన మాట్లాడారు. తమ ముందున్నది తెలంగాణ ఎజెండా మాత్రమేనని, తెలంగాణకు అనుకూలంగా ముందుకు వచ్చే ఏ రాజకీయ పార్టీతోనైనా పనిచేయడానికి తాము సిద్ధంగా ఉన్నామని ఆయన చెప్పారు. తెలంగాణ సాధన కోసం వచ్చే నెల 3,4 తేదీల్లో దీక్షలు చేపట్టనున్నట్లు ఆయన తెలిపారు.

తెలంగాణ కోసం తెలంగాణ ప్రజలంతా ఏకమయ్యారని, తెలంగాణ రాజకీయ నాయకులే ఏకం కావాల్సిన అవసరం ఉందని ఆయన అన్నారు. తెలంగాణ రాజకీయ నాయకులు ఏకం కాకుంటే తెలంగాణ ప్రజలు సహించబోరని ఆయన అన్నారు. తెలంగాణ సాధన కోసం రాజకీయ పార్టీలు జెండాలను పక్కన పెట్టాలని ఆయన సూచించారు. నాగం జనార్దన్ రెడ్డితో పాటు తెలుగుదేశం తిరుగుబాటు శాసనసభ్యుడు హరీశ్వర్ రెడ్డి కూడా మీట్ ద ప్రెస్ కార్యక్రమంలో పాల్గొన్నారు.

Published On June 27, 2011