ఆవేదనతోనే తెలంగాణ నేతల రాజీనామాల నిర్ణయం

By Pratap

Published: Saturday, July 2, 2011, 14:41 [IST]

హైదరాబాద్‌: ఆవేదనతోనే తెలంగాణ ప్రజాప్రతినిధులు రాజీనామాలు చేయాలనే నిర్ణయం తీసుకున్నారని ప్రదేశ్ కాంగ్రెసు కమిటీ (పిసిసి) అధ్యక్షుడు బొత్స సత్యనారాయణ వ్యాఖ్యానించారు. మంత్రులు సారయ్య, సునీతా లక్ష్మారెడ్డి, రాంరెడ్డి వెంకటరెడ్డిలతో సమావేశమైన అనంతరం ఆయన శనివారం మీడియాతో మాట్లాడారు. తెలంగాణ ప్రజాప్రతినిధుల రాజీనామాల విషయాన్ని పార్టీ అధిష్టానం దృష్టికి తీసుకుని వెళ్తానని ఆయన చెప్పారు. తెలంగాణ సమస్య శాశ్వత పరిష్కారానికి తాను ప్రయత్నిస్తానని ఆయన అన్నారు. రాష్ట్రంలో ప్రస్తుతం ప్రత్యేక పరిస్థితులు నెలకొన్నాయని ఆయన అభిప్రాయపడ్డారు.

రాజీనామాల విషయంలో తొందరపడవద్దని, పునరాలోచించుకోవాలని బొత్స సత్యనారాయణ తమకు చెప్పినట్లు మంత్రి సునీతా లక్ష్మారెడ్డి చెప్పారు. తెలంగాణ విషయాన్ని పార్టీ అధిష్టానం చూసుకుంటుందని కూడా చెప్పారని ఆయన అన్నారు. శుక్రవారం జరిగిన పరిణామాలను తాము బొత్స సత్యనారాయణకు వివరించినట్లు మరో మంత్రి సారయ్య చెప్పారు. ప్రజల అభీష్టం మేరకే తాము రాజీనామా చేయాలని నిర్ణయం తీసుకున్నామని తాను బొత్సకు చెప్పినట్లు ఆయన తెలిపారు. తమపై ఉన్న ఒత్తిళ్లను అర్థం చేసుకోవాలని తాము చెప్పామని ఆయన అన్నారు. పార్టీ అధిష్టానం ఆదేశాలను గౌరవిస్తూనే ప్రజల మనోభావాలను గౌరవిస్తామని మంత్రి రాంరెడ్డి వెంకటరెడ్డి చెప్పారు.

Published On July 2, 2011