కెసిఆర్ ట్రాప్‌లో టి- నేతలు పడొద్దు: రఘువీరా

అనంతపురం/ నెల్లూరు/ విజయవాడ: తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు ట్రాప్‌లో పడవద్దని సీమాంధ్రకు చెందిన రాష్ట్ర రెవెన్యూ మంత్రి రఘువీరా రెడ్డి తమ కాంగ్రెసు పార్టీ తెలంగాణ ప్రజాప్రతినిధులకు సూచించారు. కేసీఆర్‌ ఎజెండాకు లోబడి తెలంగాణ నేతలు రాజీనామాలకు సిద్ధపడటం అర్థరహితమని ఆయన శనివారం అన్నారు. కాంగ్రెస్‌ ఎమ్మెల్యేలను రెచ్చగొట్టి ఉచ్చులోకి లాగే ప్రయత్నం చేస్తున్నారని ఆయన శనివారం అనంతపురంలో మీడియా ప్రతినిధుల సమావేశంలో అన్నారు.

వైయస్సార్ కాంగ్రెసు పార్టీ అధ్యక్షుడు వైయస్ జగన్‌ది ఓదార్పు యాత్ర కాదు, ముమ్మాటికీ రాజకీయ యాత్రేనని మంత్రి విమర్శించారు. వైఎస్‌ పేరు చెప్పుకుని ప్రభుత్వాన్ని, ప్రజల్ని జగన్‌ బ్లాక్‌మెయిల్‌ చేస్తున్నారని దుయ్యబట్టారు. తెలంగాణలో కాంగ్రెసు, తెలుగుదేశం పార్టీలను తుడిచిపెట్టాలని కెసిఆర్ ప్రయత్నిస్తున్నారని కాంగ్రెసు సీమాంధ్ర శాసనసభ్యుడు ఆనం వివేకానంద రెడ్డి విమర్శించారు. కెసిఆర్ కాంగ్రెసు తెలంగాణ నేతలను రెచ్చగొడుతున్నారని ఆయన అన్నారు.

సమైక్యాంధ్రలోనే అభివృద్ధి జరుగుతుందని కాంగ్రెసు సీమాంధ్ర శాసనసభ్యుడు మల్లాది విష్ణు అన్నారు. తాము సమైక్యాంధ్రకు కట్టుబడి ఉన్నామని ఆయన శనివారం మీడియా ప్రతినిధులతో అన్నారు. సమైక్యాంధ్రకు కట్టుబడి ఉండాలని పార్టీ అధిష్టానాన్ని కోరడానికి తాము ఈ నెల 6,7 తేదీల్లో ఢిల్లీలో ఉంటామని ఆయన చెప్పారు.