వైయస్ జగన్ పార్టీ ప్లీనరీని తాకిన తెలంగాణ సెగ

By Pratap

Published: Saturday, July 9, 2011, 10:40 [IST]

కడప: వైయస్ జగన్ నాయకత్వంలోని వైయస్సార్ కాంగ్రెసు పార్టీ ప్లీనరీ సమావేశాలకు శనివారం తెలంగాణ సెగ తాకింది. తెలంగాణపై వైయస్సార్ కాంగ్రెసు పార్టీ తన వైఖరిని ప్రకటించనున్న నేపథ్యంలో తెలంగాణవాదులు ప్లీనరీలో జై తెలంగాణ నినాదాలు చేశారు. అందుకు ప్రతిగా సీమాంధ్ర నాయకులు, కార్యకర్తలు సమైక్యనినాదాలు చేశారు. ఇరు పక్షాల మధ్య వాగ్వివాదం కూడా చెలరేగింది. వారికి సర్దిచెప్పడానికి పార్టీ నాయకులు ప్రయత్నించారు. తెలంగాణ రాష్ట్ర ఏర్పాటుకు అనుకూలంగా వైయస్ జగన్ నిర్ణయం తీసుకోవాలని తెలంగాణ నాయకులు అభిప్రాయపడుతుండగా, తెలంగాణకు ప్యాకేజీల వంటివి ఇచ్చి రాష్ట్రాన్ని సమైక్యంగా ఉంచాలని సీమాంధ్ర నాయకులు అభిప్రాయపడుతున్నారు.

కాగా, అంతకు ముందు వైయస్ జగన్ పార్టీ తెలంగాణ నాయకులతో సమావేశమై పార్టీ తీసుకోవాల్సిన వైఖరిపై సుదీర్ఘంగా చర్చించారు. శాసనసభ్యురాలు కొండా సురేఖ, ఎమ్మెల్సీ కొండా మురళి శుక్రవారం సమావేశంలో జై తెలంగాణ నినాదాలు చేశారు. శనివారం మధ్యాహ్నం వైయస్ జగన్ తెలంగాణపై తన వైఖరి ప్రకటించే అవకాశం ఉంది. వివాదాస్పదమైన ఎస్సీ రిజర్వేషన్ల వర్గీకరణకు వైయస్ జగన్ అనుకూలంగా నిర్ణయం తీసుకున్నారు. జగన్ ప్రకటించబోయే తెలంగాణ వైఖరిపై సర్వత్రా ఉత్కంఠ నెలకొంది.

Published On July 9, 2011