నాగం, హరీష్ రావు అరెస్టు, సిఎంపై కెటిఆర్ ఫైర్

హైదరాబాద్: ఉస్మానియా విశ్వవిద్యాలయంలో విద్యార్థులు తెలపెట్టిన సామూహిక దీక్షకు మద్దతు తెలిపేందుకు అసెంబ్లీ మీడియా పాయింటు దగ్గర నుండి వెళ్లడానికి సిద్ధమైన తెలుగుదేశం పార్టీ బహిష్కృత శాససనభ్యుడు నాగం జనార్దన్ రెడ్డి, తెలంగాణ రాష్ట్ర సమితి శాసనసభ్యులు కె హరీష్ రావు, కల్వకుంట్ల తారక రామారావులను పోలీసులు అరెస్టు చేశారు. పోలీసులు తమను అరెస్టు చేయడాన్ని వారు తీవ్రంగా ఖండించారు. ముఖ్యమంత్రి కిరణ్ కుమార్ రెడ్డి, ప్రభుత్వంపై కెటిఆర్ తీవ్ర ఆగ్రహం వ్యక్తం చేశారు. ముఖ్యమంత్రి కిరణ్‌కు సిగ్గు లజ్జా ఉంటే రాజీనామా చేయాలని డిమాండ్ చేశారు. సిఎం ప్రజాస్వామ్య రాజ్యం కాకుండా పోలీసు రాజ్యాన్ని నడుపుతున్నట్లుగా కనిపిస్తోందని అన్నారు.

కాగా అంతకుముందు మీడియా పాయింటు వద్ద నాగం జనార్దన్ రెడ్డి మాట్లాడారు. ఉస్మానియా విశ్వవిద్యాలయంలో ఉన్న పోలీసు బలగాలను వెంటనే వెనక్కి పిలిపించాలని ఆయన డిమాండ్ చేశారు. విద్యార్థుల దీక్షకు మద్దతు తెలుపుతున్నట్లు ప్రకటించారు. ప్రజాస్వామ్యయుతంగా మద్దతు తెలిపే హక్కు అందరికీ ఉందని అయితే విద్యార్థుల దీక్షను అడ్డుకోవడానికి ప్రయత్నించడం ద్వారా నిరసన తెలిపే హక్కును హరించి వేస్తుందన్నారు. ప్రభుత్వం ఇలాగే చేస్తే ఉద్యోగ సంఘాలు సహాయనిరాకరణకు సిద్ధంగా ఉంటాయని హెచ్చరించారు. ప్రభుత్వం చాప్టర్ 8ని ప్రయోగించడం మానుకోవాలని సూచించారు. విద్యార్థుల దీక్షను అడ్డుకోవడం అప్రజాస్వామికం అని బిజెపి మాజీ రాష్ట్ర అధ్యక్షుడు బండారు దత్తాత్రేయ అన్నారు.

English summary

Police arrested tdp suspended mla Nagam Janardhan Reddy, trs mlas harish rao and ktr today at assembly media point.