వైయస్ జగన్ ఆస్తులపై సిబిఐ దర్యాప్తు మొదలు

By Pratap

Published: Thursday, July 14, 2011, 19:50 [IST]

హైదరాబాద్: వైయస్సార్ కాంగ్రెసు పార్టీ అధ్యక్షుడు వైయస్ జగన్మోహన్ రెడ్డి ఆస్తులపై కేంద్ర దర్యాప్తు సంస్థ (సిబిఐ) దర్యాప్తు ప్రారంభమైంది. ఈ మేరకు ఓ తెలుగు టీవీ చానెల్‌లో గురువారం వార్తాకథనం ప్రసారమైంది. హైకోర్టు ఆదేశాల మేరకు సిబిఐ దర్యాప్తు ప్రారంభమైంది. డిఐజి లక్ష్మినారాయణ నేతృత్వంలో ఈ దర్యాప్తు ప్రారంభమైనట్లు చెబుతున్నారు. జగన్ ఆస్తులపై ప్రాథమిక దర్యాప్తు జరిపి నివేదికను సీల్డ్ కవర్‌లో తమకు సమర్పించాలని హైకోర్టు మధ్యంతర ఉత్తర్వులు జారీ చేసిన విషయం తెలిసిందే. ఈ మేరకు సిబిఐ దర్యాప్తు ప్రారంభమైనట్లు సమాచారం.

వైయస్ జగన్ ఆస్తులపైనే కాకుండా ఎమ్మార్ ప్రాపర్టీస్ వ్యవహారంపై దర్యాప్తు జరపాలని హైకోర్టు ఆదేశించింది. జగన్ ఆస్తుల విషయంలో ప్రాథమిక సాక్ష్యాలు లభ్యమైతే హైకోర్టు పూర్తి స్థాయి దర్యాప్తునకు కోర్టు సిబిఐని ఆదేశించే అవకాశాలున్నాయి. వైయస్ జగన్ ఆస్తులపై, ఆర్జనపై ప్రస్తుత మంత్రి శంకరరావు శాసనసభ్యుడిగా ఉన్నప్పుడు రాసిన ఓ లేఖను హైకోర్టు తనంతతానుగా విచారణకు స్వీకరించింది. ఈ కేసులో తెలుగుదేశం నాయకులు ఎర్రంనాయుడు, యనమల రామకృష్ణుడు, బైరెడ్డి రాజశేఖర రెడ్డి, న్యాయవాది షేర్వాణి ఇంప్లీడ్ అయ్యారు.

Published On July 14, 2011