టిడిపితో కూడా కలిసి పనిచేస్తాం: పొన్నం ప్రభాకర్

హైదరాబాద్: తెలంగాణపై నిర్ణయం తీసుకోవడంలో జాప్యం జరిగితే తెలుగుదేశం పార్టీతో కూడా కలిసి పోరాటం చేస్తామని కాంగ్రెసు తెలంగాణ ప్రాంత పార్లమెంటు సభ్యుడు పొన్నం ప్రభాకర్ చెప్పారు. తెలుగుదేశం, తెలంగాణ రాష్ట్ర సమితి (తెరాస), సిపిఐ, బిజెపిలతో కూడా కలిసి తాము తెలంగాణ కోసం పోరాటం చేస్తామని ఆయన శుక్రవారం మీడియా ప్రతినిధుల సమావేశంలో చెప్పారు. రెండువారాలైనా కావచ్చు, మూడు వారాలైనా కావచ్చు, తెలంగాణ రాష్ట్రం ఏర్పాటు తప్పదని ఆయన అన్నారు. తెరాస అధ్యక్షుడు కె. చంద్రశేఖర రావు కాంగ్రెసు కండువా వేసుకుంటే తప్పేమిటని ఆయన అడిగారు. కెసిఆర్ కాంగ్రెసు కండువా వేసుకోవడాన్ని కూడా రాజకీయం చేయడం తగదని ఆయన సలహా ఇచ్చారు.

కెసిఆర్ కాంగ్రెసు కండువా వేసుకోవడంపై చర్చ జరుగుతోందని, జరగితే మంచిదని ఆయన అన్నారు. రాజకీయాల్లో అన్ని అవకాశాలుంటాయని ఆయన అన్నారు. తెలుగుదేశం పార్టీ అధ్యక్షుడు నారా చంద్రబాబు నాయుడిలాగా ఆంధ్రలో ఓ కండువా, తెలంగాణలో మరో కండువా వేసుకోవాలని చెప్పడం లేదు కదా అని ఆయన వ్యాఖ్యానించారు. తెలంగాణ కోసం అన్ని పార్టీలూ కలుస్తాయని ఆయన చెప్పారు. చర్చల ప్రక్రియను కూడా బుజ్జగింపులు అంటే ఎలా అని ఆయన అడిగారు. తమ పార్టీ అధ్యక్షురాలు సోనియా గాంధీని విమర్శించిన వైయస్సార్ కాంగ్రెసు పార్టీ నాయకుడు అంబటి రాంబాబును ఖబడ్దార్ అంటూ ఆయన హెచ్చరించారు. సోనియాను విమర్శిస్తే కాంగ్రెసు కార్యకర్తలు బుద్ధి చెప్తారని ఆయన అన్నారు. తామంతా రాజీనామాలు చేసిన తర్వాత పిలిచి మాట్లాడకపోవడం ద్వారా ముఖ్యమంత్రి కిరణ్ కుమార్ రెడ్డి తప్పు చేశారని ఆయన అన్నారు.