వైయస్ జగన్‌పై సుప్రీంకోర్టులో టిడిపి కెవియెట్

By Srinivas

Published: Friday, July 15, 2011, 14:37 [IST]

న్యూఢిల్లీ: వైయస్సాఆర్ కాంగ్రెసు పార్టీ అధ్యక్షుడు వైయస్ జగన్మోహన్ రెడ్డి కేసుపై తెలుగుదేశం పార్టీ సుప్రీం కోర్టులో ముందుగా శుక్రవారం కెవియట్ దాఖలు చేసింది. రాష్ట్ర అత్యున్నత న్యాయస్థానం హైకోర్టు జగన్ ఆస్తులపై ప్రాథమిక దర్యాఫ్తుకు ఆదేశించిన నేపథ్యంలో వైయస్ జగన్ సుప్రీం కోర్టుకు వెళతాడనే వార్తలు వచ్చిన నేపథ్యంలో టిడిపి తమ న్యాయవాదితో ముందుగానే కెవియెట్ దాఖలు చేయించింది. కెవియెట్ దాఖలు చేయడం వలన సుప్రీం కోర్టుకు జగన్ కేసు వచ్చినప్పుడు తెలుగుదేశానికి కోర్టు తెలియజేయాల్సి ఉంటుంది. టిడిపిని కేసులో ఇంప్లీడ్ చేస్తారు.

కాగా టిడిపి సీనియర్ నేత ఎర్రన్నాయుడు శ్రీకాకుళంలో జగన్, కాంగ్రెసు పార్టీలపై తీవ్రస్థాయిలో ధ్వజమెత్తారు. కేంద్ర ప్రభుత్వం అవినీతిపరులకు కొమ్ముకాస్తుందని ఆరోపించారు. యుపిఏ హయాంలో జరిగిన భారీ అవినీతి విషయంలో కోర్టులు జోక్యం చేసుకున్న తర్వాతనే కేంద్రంలో కదలిక రావడం విచారకరమన్నారు. జగన్ అవినీతిపై వెంటనే చర్యలు తీసుకోవాలని ఆయన డిమాండ్ చేశారు.

Published On July 15, 2011