బాబు చర్చలు: ఎర్రబెల్లి, మోత్కుపల్లి మధ్య సయోధ్య

By Pratap

Published: Saturday, July 16, 2011, 16:24 [IST]

హైదరాబాద్: తెలుగుదేశం పార్టీ తెలంగాణ శాసనసభ్యులు ఎర్రబెల్లి దయాకరరావు, మోత్కుపల్లి నర్సింహులు మధ్య సయోధ్య కుదిరింది. మోత్కుపల్లి నర్సింహులును పార్టీ అధ్యక్షుడు నారా చంద్రబాబు నాయుడు బుజ్జగించి, సయోధ్య కుదిరించడంలో విజయం సాధించారు. తనను కొందరు తప్పుదోవ పట్టించిన మాట నిజమేనని, ఇక ముందు అలా జరగకుండా చూస్తానని చంద్రబాబు మోత్కుపల్లి నర్సింహులుకు హామీ ఇచ్చారు. దీంతో పార్టీ తెలంగాణ శాసనసభ్యుల మధ్య నెలకొన్న విభేదాలకు తెర పడింది. మోత్కుపల్లి నర్సింహులు, ఎర్రబెల్లి దయాకర రావు కలిసి శనివారం మీడియా ప్రతినిధుల సమావేశం నిర్వహించారు.

రాజీనామాలను ఆమోదించాలని కోరడానికి వారు శాసనసభ స్పీకర్ నాదెండ్ల మనోహర్‌ను కలిసిన తర్వాత మీడియా ప్రతినిధులతో మాట్లాడారు. తెలంగాణ కోసం తాము ఎంతటి త్యాగాలకైనా సిద్ధమని టిడిపి తెలంగాణ ఫోరం కన్వీనర్ ఎర్రబెల్లి దయాకర రావు చెప్పారు. అన్ని వర్గాలతో చర్చించి భవిష్యత్తు కార్యాచరణను రూపొందించుకుంటామని ఆయన చెప్పారు. రాజీనామాల ఆమోదంపై వేచి చూస్తామని ఆయన చెప్పారు. తమ రాజీనామాలను ఆమోదింపజేసుకోవడానికి తాము సిద్ధంగా ఉన్నామని, మిగతా పార్టీలవారు కూడా అందుకు సిద్ధపడాలని మోత్కుపల్లి నర్సింహులు అన్నారు. రాజకీయ సంక్షోభం సృష్టిస్తేనే తెలంగాణ వస్తుందని ఆయన అన్నారు.

Published On July 16, 2011