సోనియా ఆస్తులపై విచారణ జరగాలి: మారెప్ప

By Pratap

Published: Saturday, July 16, 2011, 17:36 [IST]

హైదరాబాద్: తమ పార్టీ అధ్యక్షుడు వైయస్ జగన్మోహన్ రెడ్డి ఆస్తులపై కాంగ్రెసు నాయకులు చేస్తున్న వ్యాఖ్యలపై మాజీ మంత్రి, వైయస్సార్ కాంగ్రెసు పార్టీ నాయకుడు మూలింటి మారెప్ప విరుచుకుపడ్డారు. కాంగ్రెసు అధ్యక్షురాలు సోనియా గాంధీ, తెలుగుదేశం పార్టీ అధ్యక్షుడు నారా చంద్రబాబు నాయుడి ఆస్తులపై కూడా విచారణ జరగాలని ఆయన శనివారం మీడియా ప్రతినిధులతో అన్నారు. సోనియా ఆస్తులపై ఫారిన్ బ్యూరో ఆఫ్ ఇన్వెస్టిగేషన్ సంస్థతో విచారణ జరిపించాలని ఆయన వ్యాఖ్యానించారు. సిబిఐని కాంగ్రెసు బ్యూరో ఆఫ్ ఇన్వెస్టిగేషన్‌గా ఆయన అభివర్ణించారు. సోనియా ఆస్తులపై ప్రైవేట్ సంస్థతో విచారణ జరిపించాలని ఆయన అభిప్రాయపడ్డారు.

దివంగత నేత వైయస్ రాజశేఖర రెడ్డి హయాంలో పందికొక్కుల్లా దోచుకున్న మంత్రులు, నాయకులు ఇప్పుడు జగన్మోహన్ రెడ్డిపై ఆరోపణలు చేస్తున్నారని ఆయన వ్యాఖ్యానించారు. ఎన్నికలు వస్తే గెలవలేమనే భయంతో జగన్‌పై ఆరోపణలు చేస్తున్నారని ఆయన అన్నారు. సోనియా వేరే దేశం నుంచి మనల్ని పాలిస్తున్నారని ఆయన అన్నారు.

Published On July 16, 2011