అక్క కళ్లలో ఆనందం చూడటానికి బావను చంపేశాడు

By Srinivas

Published: Monday, July 18, 2011, 11:15 [IST]

గుంటూరు: బావ కళ్లలో ఆనందం చూడటానికే చంపేశాను అని డైలాగులు అందరికీ సుపరిచయమే. కానీ గుంటూరు జిల్లాలో ఓ యువకుడు తన అక్క కళ్లలో అనందాన్ని చూడటానికి బావను చంపేశాడు. గుంటూరు జిల్లాకు చెందిన రజనీ అనే యువతికి సత్తెనపల్లికి చెందిన శ్రీనివాస్ అనే వ్యక్తితో పదేళ్ల క్రితం వివాహం అయింది. పెళ్లైన ఎనిమిదేళ్ల వరకు శ్రీనివాస్ రజనీని బాగానే చూసుకున్నాడు. అతను పాల వ్యాపారి. అయితే రెండేళ్ల క్రితం పాల వ్యాపారంలో నష్టం రావడంతో అప్పటి నుండి శ్రీనివాస్ తాగుడుకు బానిసయ్యాడు. రోజూ తాగి వచ్చి భార్య రజనిని చితక బాధేవాడు. రోజు ఆమెను వేధించేవాడు. భర్త వేధింపులు తాళలేక ఇటీవల రజనీ తన ఇద్దరు పిల్లలతో కలిసి పుట్టింటికి వచ్చింది. దగ్గరలోని సెల్ ఫోన్ షాపులో పని చేస్తూ ఇద్దరు పిల్లలను పోషించుకుంటోంది.

అయితే ఇటీవలి కాలంలో తన భార్యను కాపురానికి పంపించాలని శ్రీనివాస్ అత్తమామలను వేధించడం ప్రారంభించాడు. భార్య పని చేస్తున్న సెల్ ఫోన్ దుకాణం వద్దకు వెళ్లి గొడవపడేవాడు. ఈ విషయాన్ని రజనీ తన సోదరుడు రమేష్‌కు చెప్పింది. దీంతో ఆగ్రహం చెందిన రమేష్ తన స్నేహితులతో కలిసి బావకు పుల్‌గా బీరు తాగించి ఊరు బయటకు తీసుకు వెళ్లి కత్తితో నరికాడు. ఎవరూ గుర్తు పట్టకుండా కాలబెట్టాడు. అయితే క్లూస్ టీం రంగంలోకి దిగడంతో బావమరిది హత్య చేసినట్లు బయటపడింది. పోలీసులు నిందితులను అదుపులోకి తీసుకొని విచారిస్తున్నారు.

Published On July 18, 2011