నిర్బంధించి విద్యార్థులపై దారుణ ప్రయోగాలు

By Pratap

Published: Monday, July 18, 2011, 18:33 [IST]

విశాఖపట్నం: ఇద్దరు విద్యార్థులను మూడు రోజులుగా నిర్బంధించి ఓ ఔషధ సంస్థ వారిపై దారుణమైన ప్రయోగాలు చేస్తోంది. నిర్బంధం నుంచి తప్పించుకుని ఆ ఇద్దరు విద్యార్థులు పోలీసులకు ఫిర్యాదు చేశారు. దీంతో ఆక్టిమస్ బయో కంపెనీ అనే ఔషధ సంస్థపై పోలీసులు కేసు నమోదు చేశారు. అజయ్, నరేష్ అనే ఇద్దరు ఇంజనీరింగ్ విద్యార్థులను నిర్బంధించి, వారి నుంచి రక్తం నమూనాలను సేకరిస్తూ, వారికి కాలం చెల్లిన మందు బిల్లలు ఇస్తూ వస్తున్నారు. దీంతో వారు అనారోగ్యానికి గురయ్యారు. రోజుకు 20 సార్లు రక్తం నమూనాలను సేకరిస్తూ వచ్చారు. పది, పదిహేను కాలం చెల్లిన మందు బిల్లలను వారిచేత మింగిస్తూ వస్తారు. ఇందుకుగాను వారికి రోజుకు ఆరు వేల రూపాయలు ఇవ్వజూపారు.

కొత్త ఫార్ములాతో మందులను తయారు చేయడానికి తాము ఈ ప్రయోగాలు చేస్తున్నట్లు ఆక్టిమస్ కంపెనీ ప్రతినిధులు అంటున్నారు. విద్యార్థుల అనుమతితోనే ఈ ప్రయోగాలు చేస్తున్నామని, సామాజిక సేవ కోసం తాము అందుకు సిద్ధంగా ఉన్నామని విద్యార్థులు చెప్పినట్లు వారు తెలిపారు. తెల్లకాగితంపై విద్యార్థులు సంతకాలు చేసి ఇచ్చినట్లు కూడా చెబుతున్నారు. విద్యార్థుల తల్లిదండ్రులకు ఈ విషయం చెప్పలేదని వారంటున్నారు. ఈ సంస్థ రఘునాథ రెడ్డి అనే ప్రవాస భారతీయుడికి చెందిందని తెలుస్తోంది.

Published On July 18, 2011