కెసిఆర్‌, కోదండరామ్‌కు చెక్ పెట్టేందుకు కొత్త జెఏసి

హైదరాబాద్: తెలంగాణ రాష్ట్ర సమితి అధ్యక్షుడు కల్వకుంట్ల చంద్రశేఖర రావుకు, తెలంగాణ ఐక్యకార్యాచరణ సమితి చైర్మన్ కోదండరామ్‌కు చెక్ పెట్టేందుకు తెలుగుదేశం పార్టీ కొత్త ఎత్తుగడలు వేస్తున్నట్లుగా తెలుస్తోంది. జూలై నాలుగున రాజీనామాలు చేసిన అనంతరం తెలంగాణ తెలుగుదేశం పార్టీలో కొత్త ఉత్సాహం కనిపిస్తోంది. టిడిపి వారు రాజీనామాలు చేసిన తర్వాత కాంగ్రెసు, తెలంగాణ రాష్ట్ర సమితి, సిపిఐ, భారతీయ జనతా పార్టీ వరుసగా రాజీనామాలు చేయడంతో సంక్షోభం సృష్టించిన ఘనత టిడిపికి పునాది వేసిన ఘనత టిడిపికి దక్కింది. అదే ఉత్సాహంతో టిడిపి బస్సుయాత్రను చేపట్టి విజయం సాధించింది. బస్సు యాత్రకు తెలంగాణలోని అన్ని జిల్లాల్లో మంచి స్పందన కనిపించింది. ఇదే అదునుగా తెలుగుదేశం పార్టీ రాజీనామాలకు ముందు తమను టార్గెట్ చేసుకొన్న కెసిఆర్, కోదండరామ్‌లకు చెక్ పెట్టే దిశలో పావులు కదుపుతున్నట్లుగా తెలుస్తోంది. కెసిఆర్ వ్యతిరేకులను ఏకం చేసి మరో ఐక్య కార్యాచరణ సమితిని తెరపైకి తీసుకు వచ్చే ప్రయత్నాలు చేస్తున్నట్టు కనిపిస్తోంది.

టిఆర్ఎస్‌తో ఎలాగు టిడిపి కలిసి పని చేయదు. ఒకవేళ కలిసి పని చేసినప్పటికీ కెసిఆర్ పెత్తనమే చెల్లుతుంది. ఇక కాంగ్రెసు, బిజెపిలు ఎలాగూ టిడిపితో పని చేయడానికి సిద్ధం లేమని స్పష్టం చేశాయి. దీంతో తామే ఓ జెఏసిని తెలంగాణ కోసం ఏర్పాటు చేయాలనే విధంగా పావులు కదుపుతున్నట్లుగా తెలుస్తోంది. బస్సు యాత్రకు మద్దతు పలికిన గద్దర్, విమలక్క తదితరులను కలుపుకొని వెళ్లాలని యోచిస్తున్నట్లుగా సమాచారం. కెసిఆర్ ఒంటెత్తు పోకడలను చాలామంది వ్యతిరేకిస్తున్నారు. వారందరినీ కూడగట్టే ప్రయత్నాలు టిడిపి తెలంగాణ ఫోరం చేసి ముందుకు వెళ్లేందుకు సిద్దమవుతున్నట్లుగా తెలుస్తోంది. టిడిపి తెలంగాణ ఫోరం సోమవారం హైదరాబాదులో సమావేశమై భవిష్యత్తు కార్యాచరణ రూపొందించుకోనున్నట్లుగా తెలుస్తోంది.

English summary

Telugudesam party is trying to check TRS chief K Chandrasekhar Rao and TJAC chairman Kodandaram. They were planning to new JAC.